СИЗГА НИМА БЎЛДИ “КУЁВЖЎРАЛАР”?

Йўлда кетяпмизу биздан сал нарироқда тўпланиб турган 20-30 чоғли ёш йигит-қизларни кўриб ҳайрон қолдик. Уларнинг бирортасини ҳам оғзида ҳимоя воситаси йўқлиги  аввало диққатимизни тортди. Сўнгра яқинлашган пайтимизда билдикки, булар ЗАГСдан ўтаётган ёш яланглар бўлишиб, Лойишнинг қоқ марказидаги БАРдан чиқиб келишаётган экан. Шу пайти негалигини билмадигу 3-4 нафар кўёв жўралар ўзаро тортишиб қолишган шекилли, бир-бирларини ҳақорат қила бошлашди, сўнгра эса биттасини ерга ётқизиб, тевалашиб кетишса бўладими? Бир-бирини ажратгани қайсиси, бир-бирини ҳақоратлагани қайсиси...

Келин-куёв эса шундай бахтли кунларида содир бўлаётган бу нохуш  маназарадан хомуш тортиб, ўзларининг машиналарига астагина ўтиришди. Уларнинг ортидан бирин-кетин шошиб-пишиб, чанг-тупроқ бўлиб кетган уст-бошларини қоқар-қоқмас гўёки ҳеч нарса бўлмагандек куёвжўралар ҳам бирин-кетин ўзларини машиналарга уришаётганлигини кўрган одамлар баттар ҳайрон қолишди. 

 Бу шоввозлар эндиликда кўчаларни тўлдириб, турнақатор машиналарда гўёки кимўзарига баҳслашаётгандек, қайсидир манзил томон шошишарди. Юқорида таъкидлаганимиздек, йигитларнинг деярли барчаси ниқобсиз, кўпчилиги спиртли ичимлик истеъмол қилишганлиги сезилиб турарди. Бу йигитлар билан ёнма-ён кетаётган ёшгина қизлар-чи, уларнинг ота-онаси кимга ишониб қизларини ЗАГСга жўнатишди экан?

Айни пайтда карантин қоидалари юмшатилгани билан ҳали вабо касаллиги чекинмаганлиги, одамлар ўртасида карантин қоидаларига амал қилиш зарурлигини ҳар бир киши яхши билади. Карантин даврида эса ўттиз кишилик тўйларга рухсат берилганлиги, бу эса халқимизга ҳам маъқул келганлиги айни ҳақиқат. Шунга қарамасдан, айрим маҳаллаларимизда бўлаётган тўйларда бу қоидалар бузилаётганлиги, кўчаларни тўлдириб, 10-12 тагача машиналарни кимўзарига ҳайдашаётганлиги, БАРларда базм қилиб, қуюшқондан чиқаётган ёшларнинг ноўрин хатти-ҳаракатларини қандай баҳолаш мумкин? Буни кўриб кўрмасликка, эшитиб эшитмасликка олаётган бепарво ота-оналар ёки тегишли мутасадди ташкилотлар-чи, улар нега жим?!