ВИРУСЛИ ГЕПАТИТ В, С, Д - ХАВФЛИ КАСАЛЛИК

Вирусли гепатит В - юқумли касалликлар бўлиб, бунда вируслар айнан жигар ҳужайраларини жароҳатлайди. Касаллик   гепатит В га чалинган  беморлардан юқади. Касаллик қандай юқади? Вирусли гепатит В одам организмига:
- Игна ва шприцлардан умумий фойдаланганда (гиёҳвандларга хос);
- ВГ қўзғатувчилари - вирусларни   ташиб юрувчи  шахслар билан жинсий алоқада бўлганда;
- Вирус билан зарарланган қон ва қон маҳсулотлари қуйилганда;
- Тиш чўтка, соқол ва тирноқ олиш ҳамда пардоз анжомларидан умумий фойдаланилганда;
- Етарли даражада зарарсизлантирилмаган тиббий асбоблар орқали турли хил тиббий (стоматологик, гинекологик, жарроҳлик ва бошқа) муолажалар олганда юқиши мумкин. 
Онадан болага бу касалликлар: ҳомиладорлик даврида; туғаётган вақтда юқиши мумкин. Касаллик қандай кечади? Организмга вирус тушиши билан касаллик бирданига бошланмайди, дастлаб вирус организмда кўпая бошлайди. Бу жараён клиник белгиларсиз кечади ва касалликни яширин даври дейилади. Гепатитнинг В турида яширин давр 6 ойгача давом этиши мумкин. Касалликнинг бошланғич даврида:
-дармон қуриши;
-иштаҳанинг йўқолиши;
-кўнгил айниши;
-овқатлангандан кейин қусиш каби ҳолатлар кузатилади. 
Баъзида касаллик оёқ бўғимларининг оғриши, грипп кўринишида ҳам намоён бўлиши мумкин. Беморнинг пешоби қизаради (меъёрда пешоб тўқ сариқ рангда бўлади). Касалликнинг сарғайиш даври 1-2 ҳафта давом этади. Бу даврда аввал кўзнинг шиллиқ пардаси, тирноқ ва тери сарғаяди. Вирусли гепатитнинг В турида кўп ҳолларда яққол сариқлик белгилари кузатилмайди.
 Гепатит В ва С нинг асоратлари касаллик вақтида аниқланмаса ва даволанмаса, жигар циррози каби оғир асоратларни  юзага келтириши мумкин. 
Эсингизда тутинг! Касалликнинг яширин ва бошланғич даврларида ва яққол белгиларсиз кечадиган турларида бемор атрофдагилар учун айниқса хавфли бўлади. У ўзи билмаган ҳолда оила аъзоларига ва яқинларига касалликни юқтиради. Вирусли гепатит В касаллигининг олдини олишда энг самарали восита бу ЭМЛАШДИР. Ҳозирги вақтда болалар эмлаш календарига мувофиқ гепатит В га қарши эмланади.  Гепатит В юқмасин десангиз: 
-шахсий гигиена қоидаларига риоя қилинг;
- тиш чўткаси, соқол олиш, тирноқ тозалаш асбобларидан фақат шахсий тарзда фойдаланинг;
- ҳимояловчи воситалардан тўғри фойдалангандагина таносил касалликлари, шунингдек гепатитнинг В туридан ҳимоя қилади;
- ҳар гал укол олаётганингизда бир марталик шприцлардан фойдаланинг;
- тиббий муолажа олаётганингизда зарарсизлантирилган асбобларнинг ишлатилишига қатъий эътибор беринг;
- гиёҳванд моддаларни ҳаттоки татиб ҳам кўрманг. Ичкиликбозлик, кашандалик каби ярамас иллатлардан йироқ бўлинг; 
- ўзингизни, фарзандларингизни гепатит В га қарши эмлатинг.