ҒАМХЎРЛИКЛАР КУЧАЙТИРИЛМОҚДА

Республикамизда аҳоли турмуш даражасини янада яхшилаш, камбағалликни қисқартириш борасида кенг миқёсдаги ишлар амалга оширилмоқда. Аҳолининг кам таъминланган қисмини давлат томонидан ҳимоя қилиш борасида ҳам қилинаётган ҳаракатлар эътиборга лойиқдир. Ўзбекистон Республикаси Президентининг 2021 йил 15 августдаги Фармонига асосан иш ҳақи, пенсиялар, стипендиялар ва нафақалар миқдори оширилди. Жорий йилнинг 1 сентябридан бошлаб мамлакатимизда меҳнатга ҳақ тўлашнинг энг кам миқдори ойига 822 минг сўм, базавий ҳисоблаш миқдори ойига 270 минг сўм, пенсияни ҳисоблашнинг базавий миқдори ойига 284 минг сўм, ёшга доир энг кам пенсиялар ойига 565 минг сўм, болаликдан ногиронлиги бўлган шахсларга бериладиган нафақалар ойига 622 минг сўм, зарур иш стажига эга бўлмаган кекса ёшдаги ва меҳнатга лаёқатсиз фуқароларга бериладиган нафақалар ойига 440 минг сўм, иш стажи тўлиқ бўлмаган чоғдаги пенсионерларнинг энг кам миқдори қўшимча тўловни ҳисобга олган ҳолда 440 минг сўм қилиб белгиланган.
Шуни алоҳида таъкидлаш керакки, айни пайтда туманимизда пенсия жамғармаси бўлими томонидан 2021 йил 1 сентябрь ҳолатига 17 391 нафар пенсия ва нафақа олувчиларга хизмат кўрсатиб келинмоқда. Агар уларни таърифлар бўйича оладиган бўлсак, ёшга доир пенсия олувчилар сони 13 654 нафарни, ногиронлик пенсиясини олувчилар сони 1485 нафарни, боқувчисини йўқотганлиги учун пенсия олувчилар сони 599 нафарни, 18 ёшгача ва 18 ёшдан катта бўлган, болаликдан ногиронлик нафақасини олувчилар 1245 нафарни, иш стажига эга бўлмаган 1, 2, 3-гуруҳ ногиронлари сони 151 нафарни, иш стажига эга бўлмаган, 65 ёшдан ошган эркаклар ва 60 ёшдан ошган аёллар нафақасини олувчилар сони 61 нафарни, иш стажига эга бўлмаган боқувчисини йўқотган нафақасини олувчилар 196 нафарни ташкил этмоқда. Шуни таъкидлаб ўтиш ўринлики, ходимларимизнинг астойдил қилган ҳаракатлари туфайли пенсиялар ўз вақтида ҳисоб-китоб қилиниб, белгиланган муддатларда Халқ банки ходимлари то-монидан эгаларига етказилиб берилмоқда. Бундан ташқари, ўз пластикларига эга бўлган пенсионерларга нафақалар ҳар ойнинг бошида туширилиб берилаяпти. 
Бир сўз билан айтганда, кейинги пайтларда пенсиялар билан боғлиқ бирорта салбий ҳолатлар кузатилмаяпти. Бунинг асосий сабабларидан бири бизнинг ходимларимиз билан Халқ банки ўртасида доимий алоқанинг бўлиб турганлигидир. Чунки, ҳар иккала ташкилотда ишлаётган хизматчиларнинг асосий вазифаси пенсионерларга ва нафақа олувчиларга намунали хизмат кўрсатишдан иборатдир. Шундай экан, биз элимизга хизмат қилаётганлигимиздан ниҳоятда мамнунмиз.