«БАЙНАЛМИНАЛ» КЎЧАСИ ЎГАЙМИ?

Лойиш марказидаги Байналминал кўчаси туман прокуратурасининг рўпарасида бўлиб, бу ердан 63-махсус мактаб интернатга, кўп қаватли уйларга ва Бўгажил қишлоғига  тумандошларимиз ҳаракатланишмоқда. Бир пайтлар шаҳарчадаги йўли энг сифатли  таъмирланган бу кўча анча таъмирталаб аҳволга келиб қолган. Сабаби ўтган йилларда истироҳат боғи ҳудудида анфитеатр қурилишига, қолаверса собиқ кўлнинг ўрнидан фуқароларга уй-жой берилгандан сўнг оғир юк машиналари тош ортиб кўчани ачинарли аҳволга  келтиришди. Айниқса,  баҳор ва қиш  пайтларида юриш  мушкуллашади. Агар кўчанинг четидан юрсангиз ҳам  ўтаётган машиналар сув сачратиб кийимла-рингизни  булғайди.

Ажабланарли томони шундаки, Байналминал кўчасига ёндош, аниқроғи қўшни бўлган «Зарафшон» кўчасининг Халқ таълими бўлимига, 45-мактабга олиб борадиган қисми яқинда сифатли таъмирланди. Қолган кўчалар ҳам таъмирдан чиқарилган. Негадир биз тилга олаётган Байналминал кўчаси эътибордан четда қолаяпти. Шу боис бу кўчада истиқомат қилаётганлар бизнинг кўча ўгайми, нима учун масъуллар таъмирлашга панжа орасидан қарашмоқда, дейишмоқда.

Ҳақиқатдан ҳам Байналминал кўчаси ўгайми, бунга нима дейсизлар, жаноб масъуллар?