Уста деҳқон тажрибаси

Чин дилдан ер билан тиллашиб меҳнат қилган киши албатта қилган саъй-ҳаракатларининг роҳатини кўради. "З.М.Бобур" маҳалласида истиқомат қилувчи Рўзимурод ака Бурхонов ҳам боғдорчилик тармоғини ривожлантиришда, хусусан, озиқ-овқат экин турларини кўпайтиришда тиним билмай меҳнат қилиб келаётган тажрибали деҳқонлардан биридир. У киши айни пайтда  ўзига тегишли бўлган бир гектарлик шафтоли боғ орасида полиз экинлари, картошка, ловия сингари озиқ-овқат маҳсулотлари ва чорва учун беда озуқаси парвариш қилмоқда.
Рўзимурод Бурхонов 35 йил давомида тумандаги пахта қабул қилиш пунктида товаршунос сифатида самарали меҳнат қилди. Шу билан бирга деҳ-қончилик ҳамда боғдорчиликка бўлган қизиқиши туфайли шу йиллар мобайнида аввалига ёнғоқ, олма боғлари, айни пайтда эса шафтоли боғини кўнгилдагидек парвариш этиб келмоқда. Айниқса, тажрибали деҳқон Р.Бурхонов  полиз экинларидан юқори ҳосил олишда катта тажриба тўплаган. Шунингдек, ҳозирга қадар буғдой ва ғўза майдонларини суғориш бўйича ҳам ўзининг бой иш тажрибасини сувчиларга маслаҳат ва тавсия сифатида бериб келади.
- Совуқни совуқ, иссиқни иссиқ демай, ҳаракат қилган киши кўзлаган мақсадларига эришади. Қишлоқ хўжалик соҳасидаги 40 йиллик меҳнат тажрибам бунга мисолдир,- дейди заҳматкаш деҳқон Рўзимурод Бурхонов.
Қишлоқ хўжалик экинларидан юқори ҳосилдорлик олиб,  эл орасида ўзининг меҳнатсеварлиги билан азиз бўлган ишбилармон деҳқон Рўзимурод Бурхоновнинг келгусидаги барча ишларига улкан ривож тилаймиз.
Суннатулло ИБРАГИМОВ.