ОНА ВА БОЛА СОҒЛОМ БЎЛСИН ДЕБ...

Аёл бир қўли билан - бешикни, бир қўли билан дунёни тебратади, дейдилар. Фарзандни дунёга келтириш ва баркамол қилиб ўстириш ота-онадан кўп меҳнат талаб қилади. Фарзанднинг ҳалол-пок, тартиб-интизомли, меҳнатсевар бўлиб ўсишида айниқса, онанинг ўрнини ҳеч нарса билан қиёслаб бўлмайди. Шунинг билан бир қаторда бугунги кунда мамлакатимизда аёлларимиз жамиятимиз ривожланишининг барча соҳаларида, жумладан, илм-фан, таълим-тарбия, соғлиқни сақлаш, маданият ва санъат соҳалари, ҳуқуқни муҳофаза қилувчи органлар, шунингдек, суд тизимида эркаклар билан бир қаторда хизмат қилиб келишмоқда.
Туман тиббиёт бирлашмасига қарашли Туғруқхона бўлимида 150 нафар хотин-қизларимиз фаолият кўрсатишади. Бўлимнинг барча бўғинида фаолият кўрсатиб, ўзларининг куну тунги беминнат хизматлари билан кўплаб оилаларимизнинг қувончига қувонч қўшиб келаётган туғруқхона бўлими мудири Ҳулкар Равшанова, бўлимнинг бош дояси Гулнора Муродова, ҳамширалар Гулнора Сатторова, Назира Хидирова, Дилафрўз Ибрагимова, шифокорлар Саима Маматова, Моҳигул Ўтаеваларнинг номларини ҳурмат билан тилга оламиз. Шуни қувонч билан айтиш керакки, 2022 йил бошидан буён туманимизда 400 нафарга яқин чақалоқлар дунёга келди. Бўлим шифокорлари она ва бола саломатлигини муҳофаза қилиш, уларга зарур шарт-шароитлар яратиш, сифатли тиббий хизмат кўрсатиш борасида ўзларининг бор имкониятларини, билим ва тажрибаларини ишга солишиб, астойдил хизмат қилишмоқда.
Биз ҳам туманимиз халқига беминнат хизмат кўрсатаётган оқ халатли шифокорларимизни эзгу мақсад йўлидаги ишларига ривож тилаб, тобора яқинлашиб келаётган баҳор байрами -  8 март - Халқаро хотин-қизлар куни билан самимий муборакбод этамиз.
Халқимиз бахту саодати, жамиятимиз келажаги йўлида хизмат қилишдан асло ҳориманг, азиз шифокорлар!