Мансабдор шахсларнинг ноқонуний ишлари

Судланувчилар (исм-фамилиялари ўзгартирилган) Оғаёр Муродов, "Самарқанд сув қурилиш инвест" ДУКнинг директори лавозимида ишлаб келиб, ташкилот мансабдор шахс ҳисобланиб, лойиҳаларни бошқариш ва қурилишни техник назорат қилиш бўлими бош мутахассиси Ҳабиб Ҳайитов ва "Самарқанд махсус сув дренаж" МЧЖ раҳбари Истам Мусаевлар билан ўзаро жиноий тил бириктиришади. Улар бир гуруҳ бўлиб, қиймати 4.691.219.666 сўмлик пудрат шартномаси тузиб, шартномага асосан 2021 йил 16 февраль ҳолатига 3.706.223.484 сўмлик иш ҳажми бажарилган бўлсада, 2020 йил 14 декабрда 4.456.658.683 сўмлик иш ҳажми бажарилиб, қурилиш-монтаж ишлари якунланганлиги ҳақида қалбаки ҳужжат расмийлаштиришади. Ҳисоб-фактураларга пудратчининг бошқа ҳаражатлари ва солиқ ушланмалари билан бирга ҳақиқатда бажарилмаган 984.996.700 сўмлик иш ҳажмларини мансаб сохтакорлигига йўл қўйган ҳолда қўшиб ёзиб, мансаб ваколатларини суиистеъмол қилиши натижасида қонун билан қўриқланадиган давлат манфаатларига жуда кўп миқдорда жиддий зиён етказганлар.
Суд ҳукмига кўра, судланувчилар Оғаёр Муродов, Ҳабиб Ҳайитов, Истам Мусаевлар Ўзбекистон Республикаси ЖКнинг тегишли моддаларига асосан 1 йил 6 ой муддатга муайян ҳуқуқдан, яъни корхоналар, муассасалар ва ташкилотларда мансабдорлик ва моддий жавобгарлик лавозимларида ишлаш ҳуқуқидан маҳрум қилиниб, уларга нисбатан базавий ҳисоблаш миқдорининг 110-100 баравари миқдорида жарима жазоси тайинланди.
Судланувчи Ҳабиб Ҳайитов, Истам Мусаевларга Ўзбекистон Республикаси ЖК 28,209-моддасининг 1-қисми билан ҳар ойда иш ҳақининг 20 фоизи миқдорида давлат даромади ҳисобига ушлаб қолган ҳолда 2 йил муддатга ахлоқ тузатиш ишлари жазоси тайинланди.