Иссиқхоналар ташкил этиш учун яратиб берилган имкониятлар

Аҳоли сони тобора ўсиб бориши озиқ-овқатга бўлган талабни ҳам ошираверади. Бу табиий ҳол, албатта. Таҳлилларга кўра, бугунги кунда дунёда 14,3 фоиз аҳолининг озиқ-овқат маҳсулотларига бўлган эҳтиёжи тўлиқ қондирилмаяпти, 12 фоизи сурункали равишда очликдан азият чекади ва бунинг 827 миллиони ривожланаётган мамлакатлар ҳиссасига тўғри келади. Ўзбекистонда озиқ-овқат тақчиллиги ҳозирча хавф туғдирмаяпти. Лекин аҳоли сони йилига ярим миллиондан кўпайиб бораётган экан, бу масала мамлакатимиз учун ҳам долзарб бўлиб қолаверади. Бундай вазиятда нима қилиш керак? Ягона йўл озиқ-овқат маҳсулотларини ишлаб чиқаришнинг юқори самарали усулларидан фойдаланишдир. Президентимизнинг 2018 йил 20 ноябрдаги "Иссиқхона комплексларини ривожлантириш учун қўшимча шарт-шароитлар яратиш чора-тадбирлари тўғрисида"ги ПҚ-4020-сон қарорни имзолади. Ҳужжат билан иссиқхоналарни ривожлантиришнинг асосий йўналишлари белгилаб берилди. Жумладан, давлат-хусусий шериклигида мева-сабзавот маҳсулотларини ишлаб чиқаришнинг бутун занжирини ўз ичига олувчи кластер шаклини жорий қилиш, энергия тежамкор технологиялардан фойдаланган ҳолда замонавий иссиқхона комплексларини ташкил этиш каби вазифалар белгиланди. Бундан  ташқари, 2021 йилнинг 7 июнида Ўзбекистон Республикаси Президентининг "Давлат-хусусий шериклик асосида ҳудудларда замонавий иссиқхона хўжаликларини ташкил қилиш чора-тадбирлари тўғрисида"ги ПҚ-5138-сон қарори қабул қилиниб, ушбу қарорга кўра, уй-иссиқхона мажмуалари давлат-хусусий шериклик тамойили асосида иссиқхона барпо этмоқчи бўлган фуқароларга аҳоли томорқалари ва хонадонларида майдони камида 10 сотих бўлган иссиқхоналар барпо этилиши, қишлоқ хўжалигида фойдаланишга киритиладиган ер майдонлари, захирадаги ҳосилдорлиги паст бўлган пахта ва ғалладан қисқарган майдонлар, яроқсиз деб топилган боғ ва токзорлар жойлашган бўш ер майдонларида ҳар бирининг майдони камида 20 сотих бўлган турар жой мажмуасини ҳам қамраб олган иссиқхоналар ташкил қилиниши белгилаб берилди.
Шунингдек, иссиқхоналар ва уй-иссиқхона мажмуаларини ишлаб чиқариш учун хориждан олиб келинадиган, Ўзбекистонда ишлаб чиқарилмайдиган материаллар, хомашёлар ва   бутловчи қисмлар 2023 йил 31 декабргача   божхона божидан озод қилиниши белгиланди.
Иссиқхоналар ва уй-иссиқхона мажмуалари учун ер солиғи ставкалари ҳамда уй-иссиқхона мажмуалари таркибидаги турар жойлар учун мол-мулк солиғи ставкалари улар фойдаланишга топширилган санадан бошлаб уч йил давомида 50 фоиз миқдорида ўрнатилади.
Бундан ташқари, ҳар йили ўтказиладиган "Ташаббус" кўрик танлови доирасида "Энг илғор иссиқхона хўжалиги" номинациясининг жорий этилиши иссиқхонлар ташкил этишни янги босқичга кўтарди. Халқимиз учун ердан қадрлироқ ва бебаҳо неъмат йўқ. Чунки, иссиқхоналар ташкил этиш нафақат оила даромадига даромад қўшади, балки эл-юрт фаровонлигини таъминлашда ҳам муҳим ўрин тутади.