ЮРИДИК ХИЗМАТ КЎРСАТИШ МАРКАЗЛАРИНИНГ ФАОЛИЯТИ КЕНГАЙМОҚДА

Маълумки, Ўзбекистон Республикаси Президентининг 2021 йил 29 июндаги "Давлат органлари ва ташкилотларига юридик хизмат кўрсатиш фаолиятини янада такомиллаштириш чора-тадбирлари тўғрисида"ги ПҚ-5168-сонли карори билан республиканинг барча туман ва шаҳарларида Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармаларининг ҳузурида юридик хизмат кўрсатиш марказлари ташкил этилиб, улар томонидан 12 та туман (шаҳар) даражасидаги давлат органлари ва ташкилотларига юридик хизмат кўрсатиш кўзда тутилган эди.
Юридик хизмат кўрсатиш марказлари фаолиятининг йўлга қўйилиши, юридик хизмат кўрсатиладиган давлат идораларининг юридик тусдаги ҳужжатлари лойиҳаларини ҳуқуқий экспертизадан ўтказиш ва қабул қилиш жараёнларини электрон шаклга ўтказувчи "E-huquqshunos" электрон тизимини яратилиши, иш юритуви тўлиқ рақамлаштирилиши ва қоғозбозликка барҳам берилиши ўзининг ижобий самарасини кўрсатмоқда.
Шу муносабат билан, Ўзбекистон Республикаси Президентининг 2022 йил 18 мартдаги "Юридик хизмат кўрсатиш марказлари фаолиятини кенгайтириш бўйича қўшимча чора-тадбирлар тўғрисида"ги ПҚ-173-сонли қарори қабул қилинди.
Ушбу қарорга мувофиқ, 2022 йил 1 августдан бошлаб республикамизнинг барча туман (шаҳар)ларидаги маҳалла ва нуронийларни қўллаб-қувватлаш бўлими, қишлоқ хўжалиги бўлими, туризм ва маданий мерос бўлими, спортни ривожлантириш бўлими, оила ва хотин-қизлар бўлими, давлат солиқ инспекцияси, аҳоли бандлигига кўмаклашиш маркази, давлат умумий ўрта таълим мактаблари, давлат мактабгача таълим ташкилотлари ҳамда давлат кўп тармоқли марказий ва оилавий поликлиникаларга ҳам юридик хизмат кўрсатиш марказлари томонидан юридик хизмат кўсатиладиган бўлди.