9-Май – Хотира ва қадрлаш куни ИНСОН АЗИЗ – ХОТИРА МУҚАДДАС

Эл-юртимиз тинчлиги, эркинлиги ва истиқболи учун жонини аямай жанг қилган қаҳрамонларимиз, уруш ва меҳнат фахрийлари, тинчликни сақлаш ва ҳаётни асраш йўлида ҳалок бўлган фидокорларнинг улуғ жасорати ҳамон барчамиз учун ибрат мактаби бўлиб хизмат қилмоқда. 

9-май — Хотира ва қадрлаш куни муносабати билан тумандаги “Оқдарё” МФЙ фаоллари билан Иккинчи жаҳон уруши фронтида жанг қилган уруш қатнашчиси Эсонов Нурмон отанинг  уйига бориб, фарзандлари билан у кишининг порлоқ хотирасини ёдга олдик. Элимиз тинчлиги, осойишталиги ва келажак авлод порлоқ ҳаёти учун жангу жадалларда қаҳрамонларча жанг қилган Нурмон      отамиздан Аллоҳ рози бўлсин. Ўша машъум урушда Рольша чегараларигача мардларча   жанг қилган ва оёғидан ўқ еб    яраланган Нурмон отани жанг майдонидан ҳамшира     аёл олиб чиққан эди. Ҳозирги кунда Нурмон отанинг 4 нафар ўғли, 2 нафар қизидан невара ва чеваралари бор.

Шуни алоҳида таъкидлаш керакки, Нурмон отанинг акаси – Эсонов Файзулла бобо ҳам урушда ҳалок бўлган эди. Аллоҳ ўтганларимизни руҳини шод айласин. 

  Дарҳақиқат, Хотира ва қадрлаш куни  миллий қадриятларимиз ва тарихий хотирамизда алоҳида ўрин тутувчи кундир.  Бу сана нафақат ўтмишда юртимиз озодлиги ва тинчлиги учун фидокорона хизмат қилган, балки бугунги кунда ҳам халқимиз фаровонлиги йўлида меҳнат қилаётган барча фидойиларни улуғлайдиган кундир. Уларнинг беқиёс хизматларини ёдга олиш, хотирасини ардоқлаш — биз учун нафақат маънавий бурч, балки миллий фахрдир.

Норбуви ЮСУПОВА,

                      “Оқдарё” МФЙ.