Оқдарё истироҳат боғининг эгаси борми?

1980 йилда ишга туширилган, кўп йиллар давомида тумандошларимизнинг мириқиб дам оладиган, ҳордиқ чиқарадиган масканига айланган истироҳат боғининг аҳволи бугун ночор. Чунки, ўтган йил туман ҳокимининг ташаббуси билан бу маскан қайсидир тадбиркорга бериб юборилди. Тўғри, тадбиркор бу жойни обод қилиш учун бирмунча ишлар қилди. Анчагина тадбирлар амалга оширилди. Бундан кўз юмиб бўлмайди. Ўтган йилги газетамизнинг 11 феврал сонида “Лойиш истироҳат боғида нима гап” сарлавҳали танқидий мақола эълон қилингач, танқиддан хулоса чиқарилиб, ижобий ишлар амалга оширилганлигини ҳам эътироф этиш керак.
Аммо, бугунги кундаги Оқдарё истироҳат боғининг кўриниши, бу ерда қилинаётган ишлар мутлақо талабга жавоб бермайди. Бу жой эгаси кўчиб кетган ҳовлини эслатади. Истироҳат боғининг Бугажил қишлоғигга олиб борувчи дарвозасининг бир томони қўпариб олинган бўлса, иккинчи қисми шу ҳудуддаги музейнинг ҳовлисида ётибди. Бу ердаги қонуний ва ноқонуний қурилган бинолар ўта таъмирга муҳтож. Истироҳат боғининг кираверишида қўйилган видеокамеранинг симлари узиб кетилган. Айни пайтда у ишламаяпти. Деворларнинг сувоғи кўчиб кетган, қўлаб тушган жойлар ҳам бор. Чиқиндилар уюмидан кўнглингиз ранжийди. Яқин ўртада бу масканда мутасадди раҳбарларнинг бўлмаганлиги шундоқ кўриниб турибди. Ҳадемай ўлкамизда Наврўз байрами бошланади. Наҳотки, буни истироҳат боғига масъул бўлган жаноблар ўйлаб кўришмаса. Хуллас, бир сўз билан айтганда Оқдарё истироҳат боғининг эгаси йўқ. Бу жойни тартибга олиш худди илгаргидек халқимизнинг севимли масканига айлантириш ниҳоятда зарур. Бунинг учун эса Истироҳат боғига ташаббускор, халқ манфаатини ўз манфаатидан устун қўядиган фидойи инсон зарур. Буни мутасаддилар тезда ўйлаб кўрадилар деган умиддамиз.