ОИЛАВИЙ МУНОСАБАТЛАР ТИКЛАНДИ

Судланувчи Даврон Дагаров фуқаролик ишлари бўйича Иштихон туманлараро судининг 08.05.2013 йилдаги суд буйруғига асосан ундирувчи Барно Давурованинг фойдасига унинг қарамоғида бўлган бир нафар вояга етмаган фарзандининг моддий таъминоти учун ҳар ойдаги иш ҳақи ва бошқа даромадларининг 1/4 қисми миқдорида алимент ундирилиши белгиланган эди. 2019 йил декабрь ойидан 2021 йил апрель ойига қадар, жами 11.901.824 сўм миқдоридаги алимент пулларини тўлашдан қасддан бўйин товлаб келганлиги сабабли, 2021 йил 26 апрель куни жиноят ишлари бўйича Оқдарё туман судининг қарорига кўра Ўзбекистон Республикаси МЖтКнинг 474-моддасининг 1-қисми билан айбли деб топилиб, унга нисбатан 15 сутка маъмурий қамоқ жазосини тайинланди. Д.Дагаров бундан ўзига ижобий хулоса чиқармасдан, 2021 йилнинг апрель ойидан 2022 йил февраль ойига қадар бўлган даврлар учун жами 7.209.140 сўм миқдоридаги алимент пулларини тўлашдан қасддан бўйин товлаб келган.
Суд жараёнида жабрланувчи Барно Давурова ҳамда судланувчи Даврон Дагаровнинг ярашув тўғрисидаги аризалари қайтадан кўриб чиқилди ва жабрланувчи Барно Давурованинг ярашувга розилиги аниқланди.
Суд мажлисида сўралган судланувчи Д.Дагаров, ўзининг кўрсатувида айбига тўлиқ иқрорлик билдириб, ўзи томонидан содир этилган жиноят ижтимоий хавфи катта бўлмаган жиноят эканлигини, жабрланувчига етказилган моддий ва маънавий зарарларни қоплаганлигини, қилмишининг оқибатидан пушаймонлигини эътиборга олиб, ярашувга розилигини, уларнинг ярашувини тасдиқлаб, ўзига нисбатан бўлган жиноят ишини ҳаракатдан тугатишни билдириб баёнот берди.
Суд, судланувчи Даврон Дагаровнинг қилмишидан чин кўнгилдан пушаймонлигини, айбига тўлиқ иқрорлигини, муқаддам судланмаганлигини, жабрланувчининг унга нисбатан моддий ва маънавий даъвоси йўқлигини, жабрланувчи ва судланувчининг ўзаро ярашганлиги ҳақида берган аризаларини, ярашув ихтиёрий эканлигини инобатга олиб, унинг жиноий ҳаракати Ўзбекистон Республикаси Жиноят Кодексининг 661-моддаси таъсир доирасига тушишлигини эътиборга олиб, судланувчи Даврон Дагаровнинг айблилик тўғрисидаги масаласини ҳал қилмай туриб жиноят ишини ҳаракатдан тугатишликни лозим деб ҳисоблайди.
Бинобарин суд, Ўзбекистон Республикаси ЖПК 84-моддасининг 4-қисми, 423, 583-586-моддаларини қўллаб, суд ажрим қилади.
Ўзбекистон Республикаси ЖК 122-моддасининг 1-қисми билан судланувчи Даврон Дагаровга нисбатан бўлган жиноят иши тарафлар ярашуви муносабати билан ҳаракатдан тугатилди.