ЙЎЛ ЁҚАСИДАГИ ЧИҚИНДИХОНА

Яқинда Муҳтарам Президентимиз раҳбарлигида ўтказилган видеоселекторда мамлакатимизда экологик аҳвол ва чиқиндиларни қайта ишлаш масалаларига алоҳида эътибор берилди. Селекторда айтилганидек, бугунги кунда жойларда амалга оширилаётган ишлар мутлақо талабга жавоб бермайди. Аксарият маҳаллаларда чиқиндилар кўча ёқаларига ташлаб кетиляпти. Маҳалла фаоллари ҳам бу масалага жиддий эътибор беришмаяпти.
Очиғини айтиш керакки, бундай ачинарли манзараларни туманимиз маҳаллаларида ҳам яққол кўриш мумкин. Бунга мисоллар бисёр. Масалан, Мавлум қишлоғидан ўтиб Ойтамғали қишлоғига бораверишдаги йўл ёқасида чиқинди уюмларига дуч келасиз. Ахир бу йўлдан кунига қанчадан-қанча автомашиналар, йўловчилар қатнашади. Шундоққина йўл ва ариқ ёқаларига ташланаётган чиқиндилар ачинарли манзара касб этган. Бу ҳудуд эгаси бўлган маҳаллалар раислари нима учундир бу чиқиндихонани бартараф этиш ҳақида ўйлаб кўришмаганга ўхшайди. Қачонгача бу аҳвол давом этади? Бу борада мутасаддилар ўзларига тегишли хулоса чиқаришиб, аҳволни яхшилайдилар деган умиддамиз.