ТОМОРҚА - КОНИ ФОЙДА

Авазали қишлоғида истиқомат қилувчи Ҳасан Искандаровнинг оиласини тадбиркор оила дейиш мумкин. Томорқада даромад манбаини яратиш мақсадида хонадон соҳиблари аввалига 3 сотих жойда икки қаватли иссиқхона қуришиб, бодринг уруғини қадашди. Экинни парваришлаш борасидаги ҳаракатлари ўзини оқлаб, маҳалласига, шунингдек, ортганини бозорга олиб чиқишди. Томорқадан даромадни янада ошириш мақсадида кейинги йилда яна битта 3 сотихли иссиқхона ҳам қуришди.
- Уйимиздаги чорва молларини сотиб, эвазига 6 сотих жойда замонавий иссиқхона барпо этдик, - дейди оила бошлиғи Ҳасан Искандаров. - Мен билан елкама-елка меҳнат қилиб келаётган фарзандларимнинг онаси Дилшода Хуррамованинг хизматини ҳам алоҳида тилга оламан. Чунки, ҳар қандай экин ҳосил олгунга қадар унинг ортида тинимсиз меҳнат ётади. Бунинг учун эса албатта сабр-тоқат билан даромадга эришишга ҳаракат қилмоқдамиз.
Айни пайтда хонадон вакиллари томонидан бодринг, булғор қалампири, қулупнай ва помидор экинлари билан бирга 60 туп лимон кўчатлари ҳам парвариш этилмоқда. Бугунги кундаги ҳаракат эртага ўз натижасини бериши бор ҳақиқат.