Qalblarga nur sochgan muallima

Har bir insonning hayotida nur taratib, yo‘l ko‘rsatuvchi, mehr berib turuvchi mo‘tabar zotlar bo‘ladi. Men uchun bu inson — Negmatova Gulnoza. U kishi mehr, sabr va samimiyligi bilan qalbimda ikkinchi ona darajasiga ko‘tarilgan ustozimdir.

Gulnoza Negmatova 1976-yilda Samarqand viloyatida tug‘ilgan. 1998-yilda Samarqand Davlat Universitetini tamomlab, ona tili va adabiyoti yo‘nalishida faoliyat boshlagan. O‘qituvchilik faoliyatlari davomida 23-24-umumta’lim maktab va litseylarda samarali mehnat qilib, ko‘plab shogirdlarni tarbiyaladi. 2023-yildan buyon Toshkentdagi Abdulla Qodiriy nomidagi ijod maktabida yosh avlodga ma’naviyat va ilm ziyosini ulashib kelmoqda.

Ustozning darslari oddiy grammatik qoidalar emas — qalb va ongni tarbiyalovchi saboqlardir. Har bir shogirdining ichki dunyosini tushunishi, e’tibor bilan yondashishi, o‘ziga xos mehribonligi u kishini o‘z kasbining fidoyisi sifatida yanada yuksaltiradi. Bugun  Gulnoza Negmatovaning ko‘plab shogirdlari turli sohalarda muvaffaqiyat qozonib, ustozlari bergan bilim va tarbiyaning mevasi bo‘lib yashamoqda.

Mening hayotimda u kishining o‘rni ayniqsa beqiyos. Universitet imtihonimga olib borib, tashqarida duo bilan kutgani, ruhlantirgani — bu chin ustozga xos g‘amxo‘rlikdir. U kishiga havas qilaman, ularga o‘xshashni orzu qilaman. Chunki Gulnoza Negmatova — halollik, sabr, ehtiyotkorlik, mehr va kamtarlik fazilatlarining yorqin namunasidir.

Bugun ustozimning mehnati faqat darslarda emas, balki yuzlab shogirdlarining hayotida, yutuqlari va to‘g‘ri tanlagan yo‘llarida aks etmoqda. Biz uchun u — yo‘lchi yulduz, ma’naviy tayanch va duosi qabul ustozdir. Allohdan ularga sog‘lik, baxt va baraka tilayman. Chunki haqiqiy ustozning qadriga yetish, uning mehnatini qadrlash — shogirdning eng ulug‘ burchidir. Negmatova Gulnoza opa esa ana shu ulug‘ nomga munosib, duoga loyiq ustozdir.

Dilnoza ABDUQODIROVA

O’zbekiston Davlat jahon tillari unversiteti 

Xalqaro jurnalistika fakulteti talabasi.