"БЕШ ТАШАББУС - БЕШ ИМКОНИЯТ"

Яқинда 16-умумий ўрта таълим мактабида Ўзбекистон Республикаси Президенти томонидан илгари сурилган 5 та муҳим ташаббус доирасида ёш авлодни маданият, санъат, спортга кенг жалб этиш, уларда ахборот технологияларидан тўғри фойдаланиш кўникмасини шакллантириш, ёшлар орасида китобхонликни тарғиб қилиш, хотин-қизлар бандлигини таъминлаш мазмунида "Беш ташаббус - беш имконият" шиори остида кенг қамровли тадбир бўлиб ўтди. Тадбирда мактабнинг барча ўқувчилари фаол қатнашдилар. 5,7-синф ўқувчилари Худойберди Тўхтабоевнинг "Сариқ девни миниб" асаридан парчани маромига етказиб ижро этган бўлишса, 9-синф қизлари ўзлари тайёрлаган ҳар хил турдаги таомлар, салатлар, тикувчилик, тўқувчилик, ишларини тақдим этишди. Бундан ташқари,  ўқувчи қизлар миллий рақсларни, созанда ўқувчиларимиз миллий чолғу асбобларидан куйлар ижро этиб давра кўркига кўрк қўшдилар. Тасвирий санъат тўгараги аъзоси бўлган 8-синфнинг рассом қизлари ўзлари чизган ажойиб суратлари билан барчанинг эътиборини тортдилар. Шунингдек, ўтказилган тадбирда спортчи ўқувчилар стол тенниси, шахмат-шашка, каратэ турлари билан ўзаро беллашувлар олиб бордилар.
Тадбирда Тошкент Аграр университети Самарқанд филиали Ижтимоий гуманитар фанлар кафедраси ўқитувчилари Б.Қаршиев, Ж.Очиловлар иштирок этишди ва ўқувчи ёшлардаги ижодкорликка, санъатга, спортга бўлган қизиқишни, иштиёқни кўриб ўзларининг самимий тилакларини билдирдилар. 
"Беш ташаббус - беш имконият" шиори остида ўтказилган тадбир жуда қизғин, таассуротларга бой бўлди. Тадбир сўнггида мактаб директори Г.Йўлдошева фаол ўқувчиларга Фахрий ёрлиқ, эсдалик совғалар топширди.
Г.ШЕРХОНОВА,
 16-мактабнинг ижодий-маданий масалалар
 бўйича тарғиботчиси.