ҒОЛИБ ИЖОДКОРЛАР ТАҚДИРЛАНДИ

Бугун Оқдарё туман ҳокимлигининг мажлислар залида Ўзбекистон Мустақиллигининг 30 йиллиги муносабати билан Оқдарё туман ҳокимлиги ва “Оқдарё овози” газетаси ҳамкорлигида ўтказилган “Менинг Ўзбекистоним!”, “Менинг Самарқандим!”, “Менинг Оқдарём!” мавзуларидаги кўрик-танловнинг якунларига бағишланган тадбир бўлиб ўтди. Тадбирда сўз олган “Оқдарё овози” газетасининг бош муҳаррири, ҳакамлар ҳайъатининг раиси Йўлчи Муҳаммадиевнинг ахборот беришича танловга 20 нафардан ортиқ ижодкорлар ўзларининг назмда ёзган ижодидан намуналар тақдим этишган. Эътиборли томони шундаки, танловда 5 нафар мактаб ўқувчилари ҳам фаол иштирок этишган. Ҳакамлар ҳайъати қарорига кўра “Самарқанд ерининг саҳовати бу” шеъри учун Ойгул Маматова, “Ўзбекистоним” шеъри учун Эркиной Қаршиева ва “Оқдарёда туғилиш” қасидаси учун Наврўз Хасановлар биринчи ўринга лойиқ деб топилди. Шунингдек, 10 нафардан ортиқ ижодкорларнинг танловда фаол иштирок этганликлари алоҳида таъкидлаб ўтилди. 
Танлов ғолиблари туман ҳокими Нажмиддин Сулаймонов томонидан Фахрий Ёрлиқлар ва қимматбаҳо эсдалик совғалари билан тақдирланди. Шунингдек, 11 нафар фаол ижодкорга туман ҳокимлигининг Фахрий Ёрлиқлари тантанали равишда топширилди. Тадбир якунида ижодкорлар бундай танловларни доимий равишда ўтказишга келишиб олдилар.