СОБИҚ ИСТИРОҲАТ БОҒИНИ КИМ ТАРТИБГА КЕЛТИРАДИ?

Газетамизнинг ўтган сонида “Лойишнинг эгаси борми?” сарлавҳали танқидий мақола чоп этилиб, унда собиқ истироҳат боғидаги ачинарли манзаралар аниқроғи айрим тадбиркорлар томонидан туман Матлубот жамиятига олиб борувчи кўча эгалланиб, девор тўсиқ ўрнатилганлиги суратлар асосида танқид қилинган эди. Танқиддан сўнг кўчадаги бетон ғиштдан қилинган девор олиб ташланди. Бироқ, минг афсуслар бўлсинки, кўчанинг ҳозирги кўриниши абгор аҳволда. Йўлнинг ёқасида ҳар хил чиқиндилар, бегона ўтларнинг ўсиб кетганлиги, шу билан бирга ғишт парчаларининг йўлда сочиб ташланганлиги кишини ғашини келтиради. Айрим фуқароларнинг эса йўлнинг ўтиш жойига тош ва қум уюмини ташлаб қўйганлиги транспорт воситаларининг ўтишига тўсқинлик қилмоқда. Бир сўз билан айтганда собиқ истироҳат боғини тартибга келтирадиган бирорта валломат Оқдарёда топилмаяпти? Ё топилармикин? Буни албатта вақт кўрсатади. Мутасаддилар бу ачинарли манзарага ҳам бир эътибор бериб, хулоса чиқаришларини истардик. Ахир ободлик ўзимизнинг яшаб турган уйимиздан, жойимиздан бошланади-ку. Буни қачон англаб етамиз, жаноблар!