Мижозлар маиший хизматдан нега норози бўлишмоқда? Келин кўйлакнинг нархи қанча?

Бугунги тинч ва фаровон ҳаётимизга халқимизнинг орзу-ҳаваси бўлган тўй-ҳашамлар, байрам ва шодиёна кунлар ярашади. Негаки, ўзбек халқи йил ўн икки ой меҳнат қилиб чарчамайди ва пешона тери, ҳалол меҳнати эвазига йиққан бор-йўқ пулини тўкин дастурхон ёзиб,    халққа егизсам дейди. Бу яхши албатта. Лекин, кейинги пайтларда тўй-ҳашамлар ва турли хил тадбирлардаги дабдабозлик, ортиқча сарф-харажатларнинг ошиб бораётганлиги ачинарли ҳолдир. Бунинг устига, келин-куёвларнинг сарпоси, уй жиҳозлашга кетадиган харажатлар, уйни мебел билан тўлдиришнинг ўзи бўлмайди. Бу ҳам майли, кўпчиликнинг эътирозига сабаб бўлаётган келин куйлакларнинг нарх-навоси ҳақида алоҳида тўхталиб ўтиш лозим. Негаки, айрим салонлардаги хизмат кўрсатиш турларининг нарх-навоси ҳаддан ташқари баланд. Хизматчилар мижозларнинг кўплигидан фойдаланиб ўзлари хоҳлаган нарх-навони қўйишмоқда.
Бир ҳамкасбимиз яқинда қизини узатди. Тўйига бориб, уни асабий ҳолатда учратдим ва бунинг сабабини сўрадим:
- Нимасини айтасиз, қизим Лойишдаги салонларнинг биридан келин кўйлак танлаган эди. Кўйлакнинг нархи осмонда экан. Қизимга шу кўйлак жуда ёқиб қолди, нархини келиштиринг, десак салон эгаси асло пастга тушмаяпти.
- Хўп, нархи қанча экан ўша кўйлакни, - деб сўрадим ундан.
- Аввалига 1000 доллар деб туриб олди. Анча тортишувдан сўнг зўрға 500 долларга туширди. Нима экан, бу кўйлак энг сўнгги модадагиси, асосийси, ҳали буни ҳеч ким киймаган эмиш... Нима ҳам қилардик, қариндош-уруғлардан қарз кўтариб бўлса-да, шу кўйлакни олиб бермасак бўлмайди. Битта-ю битта қизим бўлса, ўзи хоҳлаган кўйлагини киймаса, қаттиқ хафа бўлади...
Қизининг тўйида ўйнаб-кулиб юриш ўрнига қаттиқ қайғуга ботган онаизорга қараб ачинасан киши. Унга қизининг бахти шу қиммат кўйлакни кийишда эмаслигини, 2 соатлик тўй учун 500 доллар сарфлашнинг ўзи тўғри қарор эмаслигини уқтириб, ҳар қанча далда бермайлик, фойдаси бўлмади.
Халқимизда "Қиз чиқарган уйга қирқ йил тегинма", деган нақл бежизга айтилмаган экан. Ўйлаб қоласан киши, онаизорнинг бу аҳволга тушиб қолишига ким айбдор: Ўзининг орзу-ҳавасини ўйлаб, оила аъзоларини мушкул аҳволга солиб қўяётган қизми ёки энг сўнгги модани пеш қилиб "Хоҳласанг шу нарх, хоҳламасанг катта кўча", дея 2 соатлик прокат кўйлак учун оғзига сиққанича нархини осмонга кўтариб, одамларни қийин аҳволга солиб бўлса-да мўмай даромадга эга бўлаётган салон эгаларими? 
Туманимиз марказидаги   Лойиш шаҳарчасида жойлашган "Жасмин", "Диля", "Вазира", "Аниса", "Ширин" ва бошқа турли хил маиший хизмат кўрсатиш шаҳобчалари доимо мижозлар билан гавжум. Хотин-қизларимизнинг маиший хизмат соҳаларига бўлган талаб ва эҳтиёжлари ортиб бораётганлиги яхши албатта. Лекин, юқорида таъкидланганидек, барча   "Гўзаллик салон"ларида ҳам мижозлар учун яратилган шарт-шароитлар талаблар даражасида ташкил этилган деб бўлмайди. Уларнинг аксариятида хизмат нархлари бўйича Йўриқномалар мавжуд эмас, хизматчилар ўзлари хоҳлаган нарх бўйича хизмат кўрсатишмоқда. Салонлардаги санитария ва гигиена қоидаларига риоя қилиш талабга жавоб бермайди. Салонларда антисептик воситалар, бир марталик сочиқлар мавжуд эмас. Хизматчилар махсус ниқоблар тақиб олишмаган.
Шу ўринда савол туғилади. Тумандаги маиший хизмат кўрсатиш шахобчаларидан аҳоли нега норози бўляпти? Ахир салонлардаги келин кўйлакларнинг, қолаверса, бошқа хизмат турларининг нарх-навоси билан шуғулланадиган тегишли ташкилотлар қаерга қараяпти? Салончиларнинг ўзлари хоҳлаган нархни қўйиб олишларига ҳаққи борми?
Биз ушбу саволларимизга тегишли ташкилотларнинг жавобини кутиб қоламиз.
НОИЛАХОН.
Мавзуга оид: