ЧОРЖУДАГИ КЎЧАНИНГ ЭГАСИ БОРМИ?

15.07.2022, 10:32
ДОЛЗАРБ / Туманда

0

1

2

3

4

5

Тараққиёт маҳалласига қарашли Чоржу қишлоғига олиб борадиган ушбу кўчанинг асфальт қилинганлиги қишлоқ аҳлини, айниқса, шу йўл орқали 41-мактабга қатнайдиган ўқувчиларни беҳад қувонтирганлиги ҳақиқат. Негаки, йиллар давомида ёзда чанг-тупроқ, қишда эса лой бўлиб ётадиган ушбу катта йўл аҳоли ва  мактаб ўқувчилари учун қийинчилик ва ноқулайликларни келтириб, халқнинг ҳақли эътирозига сабаб бўлаётган эди. Эндиликда кўчага асфальт ётқизилиб, қишлоқ аҳлининг узоғи яқин, оғири енгил бўлиб, чеккан машаққати эса ортда қолди.
   Минг афсуски, ушбу кўчанинг бугунги кундаги манзараси қониқарли аҳволда эмас. Асфальт йўл орқали юрар экансиз, йўлнинг икки томонида барпо қилинган боғ-роғлар, яшил экин майдонларига қараб кўзингиз қувнасада, йўл ёқаларида ўсиб ётган бегона ўтлар, тартибсизликлар киши кўнглини хира қилади. Айниқса, ушбу суратда акс этганидек, айни пайтда йиртилиб, яроқсиз аҳволга келиб қолган -  “Самарқанд ветеринария медицина институти ўқув тажриба хўжалиги” деб ёзилган ёзув пешлавҳани ўқиб таъбингиз янада хира тортади. Ана шу боғ-роғлар ва ўқув тажриба хўжалиги чегараларига тегишли бўлган катта йўл қисмидаги майдонларни бегона ўт босиб кетганлигини қандай изоҳлаш мумкин? Бу ҳам етмаганидек, йўлнинг айрим жойларига аҳоли томонидан чиқиндилар ташлаб кетилмоқда. Ахир, бу кўчанинг эгаси борми, бор бўлса, нега ўз ҳолига ташлаб қўйилган?
   Сиз бунга нима дейсиз, ҳурматли маҳалла мутасаддилари?! Бепарволик, лоқайдлик ва сансалорлик токайгача давом этади. Ёки ушбу кўчанинг ободончилиги учун Сизга юқоридан алоҳида топшириқ керакми? Сизнинг бу борадаги жавобингизни кутиб қоламиз!

Кенжа БОТИР.

Мавзуга оид: