Инсон ва қонун ҚОИДАБУЗАРЛИК ИНСОН ЎЛИМИГА САБАБ БЎЛДИ

Судланувчи Ҳамидов Озодбек (исми шарифи ўзгартирилган), 2022 йил 23 декабрь куни соат 12:20 лар чамасида ўзига тегишли бўлган оқ рангли "Ласетти" автомашинасини Оқдарё тумани, "Кумушкент" маҳалла фуқаролар йиғини ҳудудидан ўтувчи "Самарқанд-Бухоро" М-37 автомобиль йўлининг 20-километригача Самарқанд шаҳри йўналиши бўйича бошқариб келиб, йўл чизиқлари билан белгиланган ва пиёдалар йўлини кесиб ўтишда ҳаракатланишлари учун ажратилган пиёдалар ўтиш жойи орқали юриб ўтаётган, вояга етмаган пиёда А.Л.ни уриб кетади. О.Ҳамидов йўл-транспорт ҳодисасини содир қилганлиги натижасида пиёда А.Л. нинг "оғир тан жароҳатлари" олиб шифохонада вафот этишига сабабчи бўлган.
Судланувчи Ҳамидов Озодбекка Ўзбекистон Республикаси ЖК 266-моддасининг 2-қисми билан, Ўзбекистон Республикаси ЖКнинг 57-моддасини қўллаб, Ўзбекистон Республикаси ЖКнинг 45-моддасига асосан қўшимча жазо тариқасида 2 йил муддатга муайян ҳуқуқдан, яъни транспорт воситаларини бошқариш ҳуқуқидан маҳрум этиб, ҳар ойлик иш ҳақининг 20 фоизи миқдорида давлат даромади ҳисобига ушлаб қолган ҳолда 3 йил муддатга ахлоқ тузатиш ишлари жазоси тайинланди.