ҚОИДАБУЗАРЛИКНИНГ ОҚИБАТИ

Сирож Сатторов, 2021 йил 11 ноябрь куни ўзининг бошқарувида бўлган  "Ласетти" русумли автомашинаси билан "Челак-Даҳбед" йўналишида светофорнинг қизил чироқ белгиси ёниб турган бўлишига қарамасдан, ўнг томонга, яъни "Самарқанд-Бухоро" йўналишининг 12-километрида ҳаракатланаётган вақтида, ушбу ҳудудда хизмат ўтаётган вилоят ИИБ ЙПХБ 3-отряд ЙПХ 1-сафарбарлик гуруҳи ЙПХ инспектори Х.Р. "жезл" таёқчаси ёрдамида унга тўхташ ишорасини кўрсатишига қарамасдан, унинг қонуний талабларини бажармасдан ҳаракатни давом эттиради. Шундан сўнг ЙПХ инспектори Х.Р. ўзи билан биргаликда хизмат олиб бораётган ҳамкасби, ЙПХ катта инспектори А.А. билан унга бириктирилган давлат рақамли "Ласетти" русумли хизмат автомашинасида С.Сатторовнинг бошқарувида бўлган "Ласетти" русумли автомашинани кузатиб боради. "Самарқанд-Бухоро" "М-37" автомобиль йўлининг 16 километрига келган вақтида, С.Сатторов ўзининг бошқарувидаги "Ласетти" русумли автомашинанинг ҳаракат йўналишини бирор-бир огоҳлантириш ва ишораларсиз кескин равишда А.А.нинг бошқарувида бўлган "Ласетти" русумли хизмат автомашинасининг ҳаракат бўлагига ўзгартириб, йўл-транспорт ҳодисаси содир этади ва натижада вилоят ИИБ ЙПХБга тегишли бўлган "Ласетти" русумли автомашинасига 3.854.293 сўм моддий зарар етказишга сабабчи бўлган.
Шундан сўнг, судланувчи С.Сатторов, бошқарувидаги автомашинани тўхтатиб, автомашинадан тушиб келиб, ўз хизмат бурчини бажараётган вилоят ИИБ ЙПХБ 3-отряд ЙПХ инспекторлари Х.Р. ва А.А.ларни шаъни ва қадр-қимматини беодоблик билан қасддан  таҳқирлаб, ножўя сўзлар билан ҳақорат қилади. ЙПХ инспектори Х.Р.ни уриб, унга "енгил тан жароҳати" етказиб, уларнинг қонуний фаолиятига фаол қаршилик кўрсатиб, уларнинг хизмат вазифаларини бажаришдан воз кечишга мажбур қилган.
Судланувчи Сирож Сатторовга Ўзбекистон Республикаси ЖКнинг 59,61-моддаларига асосан 4 йил муддатга озодликни чеклаш жазоси тайинланди.