Луқма ОҚДАРЁ ХАЛҚ БАНКИДА НИМА ГАП?

Кейинги йилларда аҳоли билан банк ўртасидаги муносабатларни яхшилаш борасида бир қатор қарорлар қабул қилинди. Аслини олганда банк мижоз учун ишлайди. Мижоз ҳамиша ҳақ деган гапни банкдагилар ҳам яхши билишади. 
Афсуски туман ҳудудидаги айрим банкларда тартибсизлик ҳолатлари яққол кўзга ташланмоқда. Бунга биргина мисолни келтириб ўтишимиз мумкин. Шу кунларда туман халқ банкига кириб қолгудай бўлиб қолсангиз тўлов қилишга келган мижозларнинг норозилигини кўриб беихтиёр ранжийсиз. Халқ банкининг биринчи қаватида фуқаролардан тўловларни қабул қилишга учта касса ажратилган бўлсада мижозларнинг кўплигидан залга одам сиғмай кетаяпти. Шу ўринда халқ банкининг биносида талайгина муаммолар мавжуд. Бинонинг ўзи ва хоналар таъмирга муҳтож. Аҳолининг йил сайин кўпайиб бораётганини ҳисобга олсак биринчи қаватдаги зал бугунинг талабига мутлақо жавоб бермайди. Халқ банкига замонавий типдаги янги бино қуриш лозимлигини наҳотки мутасадди раҳбарлар ўйлаб кўришмаётган бўлса? Ҳар ойнинг дастлабки ва охирги кунларида бу жой мижозлар билан ниҳоятда гавжум бўлади. Чунки фуқароларимиз коммунал тўловлар ва кредитларни мана шу кунларда амалга оширишади.  Бугун Халқ банкига тўлов қилишга борган бир танишимизнинг айтишига қараганда, банк ходимлари пластикдан пул ўтказмаймиз, нақд пул топиб келинг деган гапни айтишибди. Унинг айтишига қараганда туманнинг турли маҳаллаларидан келган бошқа мижозлар ҳам пластик картасидаги маблағни нақд пул қилиб кейин халқ банкига тўлов қилишаётган экан. Бу амалдаги қонунларимизга тўғри келадими? Наҳотки фуқароларимиз газ, электр, кредит, солиқ, контракт сингари тўловларни фақат нақд пул орқали амалга оширишса. Аниқроқ айтадиган бўлсак барча тўловларни нақд пул орқали фуқаролар тўлашлари мажбурийми? Бу саволга халқ банкининг юқорида ўтирган раҳбарлари аниқ жавоб беришса мақсадга мувофиқ бўларди.