Yurtimizda 2025-yil 15-sentabrdan 15-oktabrgacha “Yongʻindan ogohlik” umummilliy kampaniyasi oyligida faol ishtirok eting!

Soʻnggi vaqtlarda sodir boʻlayotgan yongʻinlar, is gazidan zaharlanish va havo-gaz aralashmalarining chaqnashi kabi hodisalar jiddiy xavf tugʻdirmoqda. Bu holatlar insonlar mol-mulkiga, balki hayoti va sogʻligʻiga ham katta zarar yetkazib kelmoqda.
Sodir bo‘lishi mumkin boʻlgan baxtsiz hodisalarni oldini olish va oldimizda turgan kuz-qish mavsumida xavfsizlikni taʼminlash, insonlar hayotini asrash maqsadida yurtimizda 2025-yil 15-sentabrdan 15-oktabrgacha “Yongʻindan ogohlik” umummilliy kampaniyasi oyligi joriy etildi.
Oylikning asosiy maqsadi:

• Har bir mahalladagi yakka tartibdagi va ko‘p kvartirali uylarda “xonadon bay” profilaktik ishlarini tashkil etish;
• Talabalar yotoqxonalari, moslashtirilgan binolar, ijaraga olingan hovli uylar, kvartiralar va xostellarda yongʻin, havo-gaz aralashmasining chaqnashi va is gazidan zaharlanish hodisalarining oldini olishga qaratilgan profilaktik tadbirlarni olib borish;
• Qarovchisi yoʻq, yolgʻiz yashovchi qariyalar va nogironlar, ruhiy kasalliklar dispanserlarida roʻyxatda turuvchi fuqarolar istiqomat qiladigan turar-joylarda daxldor soha vakillari bilan isitish mavsumida foydalaniladigan isitish uskunalari, dudburonlari, maishiy gaz, elektr jihozlarini koʻrikdan oʻtkazish va kamchiliklarni bartaraf etish choralarini koʻrish hamda ushbu toifadagi fuqarolarga yongʻinga qarshi yoʻl-yoʻriq va tushuntirishlar berish;
• Ijtimoiy soha obyektlari va tadbirkorlik subyektlari ishchi-xodimlari, shuningdek, mahallalarda aholi bilan yongʻinlarning oldini olish va sodir boʻlganda toʻgʻri harakat qilish koʻnikmalarini oshirishga qaratilgan yoʻl-yoʻriq va mashgʻulotlar oʻtkazish;
• Tunda insonlar qoladigan maskanlar (mehribonlik, saxovat va muruvvat uylari, shifoxonalar) hamda qurilish-taʼmirlash obyektlaridagi ishchilar uchun tashkil etilgan vaqtinchalik yotoq joylarida yongʻin xavfsizligini taʼminlash, havo-gaz aralashmasining chaqnashi, is gazidan zaharlanish hodisalarining oldini olishga qaratilgan tungi profilaktik tadbirlarni oʻtkazish.

Yana bir mavsumiy tadbirimizdan biri — “Paxta–2025” yigʻim-terim tadbiri davomida yongʻin xavfsizligini taʼminlab, milliy boyligimizni nobud qilmasdan yig‘ib olish — asosiy maqsadimizdir.
Hurmatli fuqarolar! Sizlardan quyidagilarni amalga oshirishingiz so‘raladi:

1. Uyda va xonadonda gaz, elektr va isitish jihozlaridan yong‘in xavfsizligi qoidalari asosida foydalanish;
2. Dudburonlar, shamollatish tizimlari va isitish moslamalarini mavsum boshlanishidan oldin tekshirib ko‘rish va tozalash;
3. Gaz va elektr jihozlarini nosoz holatda ishlatmaslik;
4. Bolalarga kattalar nazoratisiz elektr va gaz jihozlaridan foydalanishga yoʻl qoʻymaslik hamda ularni nazoratsiz qoldirmaslik;
5. Yongʻin yoki favqulodda vaziyatlarni sezgan zahoti darhol 101 yoki 112 qisqa raqamlariga qoʻngʻiroq qilish.

Oylik doirasida siz fuqarolar bilan birgalikda:

• Har bir mahallada “xonadon bay” tushuntirish ishlari olib boriladi;
• Talabalar, ishchilar va mahalla aholisi uchun yoʻl-yoʻriqlar va suhbatlar oʻtkaziladi;
• Televideniye, radio, internet va Telegram maxsus kanali orqali chiqishlar va tavsiyalar berib boriladi.

Hurmatli fuqarolar!
Bu tadbirlar sizning hayotingiz va yaqinlaringizning xavfsizligi uchun tashkil etilmoqda. Sizdan faollik, hamkorlik va yongʻin xavfsizligi qoidalariga qatʼiy amal qilishingizni so‘rab qolamiz.
Shuni unutmang: Xavfsizlik – har birimizning qoʻlimizda!

I. A. Namazov
Oqdaryo tuman FVB boshlig‘i, mayor