ЯШИРИН ИҚТИСОДИЁТ ВА УНИ БАРТАРАФ ЭТИШ ЙЎЛЛАРИ

Хуфиёна иқтисодиёт жамиятда жиноий характердаги фаолиятнинг авж олишига шароит яратиб берадиган, мамлакатнинг инвестицион муҳитига салбий таъсир кўрсатадиган омиллардан бири ҳисобланади. Умуман айтганда, хуфиёна иқтисодиётнинг кенгайиши ахолининг сиёсий ҳокимиятга бўлган ишончини йўқотади. Давлат томонидан олиб борилаётган иқтисодий ислоҳотларга тўсқинлик қилади. Шу сабабли хуфиёна иқтисодиётни камайтириш давлат ва жамият ривожидаги муҳим омил бўлиб хизмат қилади. Хўш хуфиёна иқтисодиётни йўқотиш учун нималар қилиш лозим?
Биринчидан, "Давлат хизматчиси тўғрисида"ги Қонунини қабул қилиб, уларнинг юқори ижтимоий ва иқтисодий ҳимояланганлиги эвазига коррупция ва порахўрликни олдини олиш лозим бўлади.
Иккинчидан, кичик тадбиркорлик субъектларига нисбатан солиқ юкини камайтириш, уларнинг фаолиятига тўсқинлик қилаётган бюрократик тўсиқларни олиб ташлаш ҳисобига уларнинг фаолиятига расмий тус бериш керак.
Учинчидан, тадбиркорлик фаолияти билан ноқонуний шуғулланган ва ўз даромадларини яширган барча тадбиркорлик субъектларига амнистия қўллаш ёки фойдани янги иш ўринлари учун сарфланадиган қисмини солиқ престидан озод қилиш, солиқ оғирлигини ишлаб чиқариш соҳасидан жисмоний шахсларни шахсий истеъмоли соҳасига ўтказиш лозим.
Тўртинчидан, аҳолининг маънавий салоҳиятини, ҳуқуқий савиясини ҳамда иқтисодий жиноятчиликка қарши имунитетини ошириш керак бўлади.
Бешинчидан, валюта соҳасини янада либерализация қилиш, йирик битимларда нақд пулсиз тўловларни амалга оширишга рағбатлантириш бериш ва унинг хажмини ошириш мақсадга мувофиқ бўлади.
Олтинчидан, иқтисодиётда давлат сектори улушини камайтириш ҳисобига тадбиркорлик ҳажмини кенгайтириш, бу соҳаларда рақобатни қўллаб-қувватлаш ва ишсизлик миқёсини камайтириш каби ишларни амалга ошириш лозим деб ҳисоблаймиз.
Зеро, дунёда бирор бир давлат хуфиёна иқтисодиётга барҳам бера олмаган, аммо уни камайтиришга эришган. Шу сабабли уни камайтириш учун юқорида келтирилган ишларни амалга ошириш лозим.