Мутахассис маслаҳати ЖИСМОНИЙ ФАОЛЛИКНИНГ АҲАМИЯТИ

"Тарбиянинг ажратиб бўлмайдиган таркиби - бу жисмоний тарбия.  Жисмоний тарбия билан мунтазам шуғулланиб турувчи киши даволанишга камдан-кам муҳтож бўлади", деб таъкидлаган Абу Али Ибн Сино бобомиз.  
Ҳаёт ҳаракатдан иборат. У орқали инсон жисмонан соғлом шаклланади, такомиллашиб боради. Мунтазам фаол, тартибли ва оқилона жисмоний машқлар инсон саломатлигини таъминловчи соғлом турмуш тарзининг асосий омилларидан биридир.  Ўсиб келаётган ёш авлод ва 40 ёшдан ошган катта ёшдан то кексаларнинг мунтазам фаол жисмоний тарбия билан шуғулланиши - инсон организмида қуйидаги ижобий жараёнларга олиб келади:
-организмдаги барча моддалар алмашинуви яхшиланади;
-барча орган ва тўқималарда қон айланиши кучаяди, қон томирлари орқали организм кислород ва зарур озиқ моддалар билан таъминланиши яхшиланади, ўсиш-ривожланиш жараёни меъёрлашади;
-иммунитет кучайиб, ташқи салбий таъсирларга қарши организм жавоб реакцияси ошади;
-организм турли чиқинди моддалардан тозаланиши тез ва самарали кечади;
-организмда мавжуд бўлган айрим яллиғланиш жараёнлари  тез сўрилиб кетади;
-инсон бутун кун давомида асаб тизими мувозанатлашиб, босиқ ва мулоҳазали бўлади;
- болаларда ўқиш сифатли ва унумли бўлиб, ижобий фикрлаш фаолияти кучаяди, ижодий жараёнлар фаоллашади;
-фаоллик, ташаббускорлик, масалага журъат билан киришиш, қийинчиликлар ва оғир меҳнатдан қўрқмаслик, ўртоқлик, мард-лик, ватанпарварлик  ҳиссиётлари самарали шаклланади;
-мунтазам фаол машқлар ҳар қандай ўсмирда гигиеник кўникмаларнинг шаклланишига олиб келади; 
-тери ости клетчаткаси ва ички аъзоларда холестерин ёғлар камайиб, тана соғ-лом, эпчил, чаққон бўлади, мушаклар тортилиб, қомат кўркам ва келишган бўлади, организм ёшаради. Тенгқурларига нисбатан анча ёш, ишчан ва соғлом кўринади;            
- эрталабки бадантарбия ҳар куни очиқ ҳавода ўтказилса, нимжонлик ва карахтлик йўқолади, у қулай ва оммабоплиги билан катта аҳамиятга эга.
Инсонга хос эринчоқлик сабаб аксар ёшларимиз ўзлари учун фойдали бўлган жисмоний машқлар билан шуғулланиш ўрнига қимматли вақтларини уяли телефон, телевизор ва компьютер қаршисида ўтириб, турли газланган, энергетик ва алкоголли ичимликлар ичиб "дам оладилар". Натижада 50-60 ёшда эмас, балки 30-40 ёшда кам-ҳаракатлилик сабаб барвақт юрак-қон томир, қандли диабет, ўсма ва бошқа турли касалликларга чалиниб, ўз мақсадларига етолмайдилар.
Болаларда жисмоний тарбия ва спортга меҳр уйғотиш оиладан бошланади. Шунинг учун болага нафақат боғча ёки мактабда, балки ота-онаси ҳам оилада эрталабки гимнастика ва жисмоний фаолликнинг аҳамиятини тўғри тушунтиришлари лозим. 
Эрталабки пиёда юриш, гимнастика   машқлари, рақс тўгараклари, йога, велосипедда сайр қилиш, сузиш, ўзбек кураши, ушу, карате, таэквандо, туманда ўтказиладиган пиёда юриш ва турли гимнастика марафонлари ҳар бир соғлом инсоннинг кундалик ҳаёти кун тартибига кириши шарт бўлган ҳаракатларидан бири бўлиши лозим. 
Миллат келажаги ҳақида қайғурган Абдулла Авлоний бобомиз ҳам бир бола тарбияси ҳақида фикр юритиб, тарбия жараёнини уч қисмга бўлган эди: "Бадан тарбияси", "Фикр тарбияси" ва "Ахлоқ тарбияси". Аввало баданнинг саломат ва бақувват бўлмоғи - қолган икки тарбияга асос бўлувчи энг керакли нарсадур. Чунки ўқимоқ, ўрганмоқ ва ўргатмоқ учун инсонга кучли ва соғлом тана лозимдур. Кўпинча соғлом бўлмаган инсонлар кўп яхши ишларга қодир бўла олмайдилар. Соғлом фикр ва соғлом ахлоқ учун мустаҳкам ва соғлом бир вужуд керакдур", деганлар. Шунинг учун ҳар куни жисмоний фаол бўлинг ва пиёда юринг,  соғлом бўласиз!
Зеро, "соғлом танда - соғ ақл" мақоли бекорга айтилмаган. 
Бундан хулоса шуки, спортни севсангиз сиз касал бўлмайсиз.