«ДУЭЛ»ДА ҚАТНАШГАНИМДАН МАМНУНМАН

14-16-сентябрь кунлари Ўзбекистон  ёзувчилар уюшмаси, ёшлар иттифоқи ва ёш ижодкорлар кенгаши томонидан ташкил қилинган "Дуэл" кўрик-танловининг Республика босқичи бўлиб ўтди. Наср, назм, бадиий таржима ва рассомчилик йўналишларида жами 69 нафар ижодкор ёшлар "Дўрмон" ижод уйига йиғилишди. 16-сентябрь куни  Тошкент шаҳридаги Aдиблар хиёбонида танловнинг финал босқичи бўлиб ўтди. Биринчи ўринга - 25 миллион сўм, иккинчи ўринга - 15 миллион сўм ва вилоятлардан йиғилган ғолиб ижодкор ёшларга - 5 миллион сўмдан пул мукофоти ва эсдалик совғалари топширилди. Наср йўналишида Қашқадарё вилоятидан Шавкат Дўстмуҳаммад, назм йўналишида қашқадарёлик Шаҳриёр Шавкат, бадиий таржима йўналиши бўйича самарқандлик Aлишер Сабрий, тасвирий санъатда Навоий вилоятидан Улуғбек Юнусовлар танловнинг мутлақ ғолиби деб топилдилар. 
- "Бу дуэл ўлдирадиган эмас, тирилтирадиган, янги-янги адабиёт вакилларини топадиган дуэл бўлди", - дейди танлов ташкилотчиси Меҳриноз Aббосова. 
Ҳақиқатан ҳам вилоятлардан борган ёшларга Дўрмон ижод уйида барча қулайликлар яратиб берилди, улар шу ерда яшаб, ўзаро фикр алмашдилар, машҳур ёзувчи шоирлар иштирокида шеърхонлик кечалари, носирлар йиғинлари ўтказилди. Финал эса ҳақиқий байрамга айланиб кетди. Даврадаги шоирларнинг шеърлари Шуҳрат Дарё, Бахтиёр Раҳмонов, Шербек Шодиев ва бошқа санъаткорлар ижросида янгради, барча жўр бўлиб куйлади. Умуман олганда, ўзгача адабий муҳит, ажойиб дўстлар, устозлардан маҳорат дарслари олган ёшларда бу танлов жуда катта таассурот қолдирди.
Мен ҳам ушбу нуфузли танловда ғолиблик шоҳсупасига кўтарилмасам-да Навоий Давлат педагогика институтининг талабаси сифатида ярим финал босқичида қатнашганимдан ўзимни бахтиёр ҳисоблайман. Айниқса, ўзбек адабиётининг йирик намоёндалари бўлган Aбдулла Орипов ва Зулфияхонимнинг  уй музейига борганлигимиз бизда катта таассурот қолдирди. Дўрмонда кўп ёзувчи шоирлар, таржимонлар билан учрашдик, суҳбатини, маслаҳатларини олдик. Наср йўналишида Назар Эшонқул бош ҳакам бўлди, ишларимни яхши баҳолади, ўзбек насри ҳақида анча суҳбат қилдик ва у кишининг шахсан ўзи биз ёш ижодкорларга 5 миллион сўм пул мукофотини топширар экан, ижоддан тўхтаб қолмаслигимизни алоҳида таъкидладилар.