“Рақамли суд” концепцияси жорий этилмоқда

Ўзбекистон Республикаси Президентининг 2025 йил 21 августдаги ПФ–140-сон қарорига асосан, судлар фаолиятига сунъий интеллект технологияларини жорий этиш, рақамлаштириш ишларини давом эттириш ҳамда судларнинг моддий-техник таъминотини яхшилаш белгиланди.

Ушбу қарор “Рақамли Ўзбекистон — 2030” стратегиясида белгиланган мақсад ва вазифалар ижросини таъминлашга қаратилган.

Қарорга мувофиқ, “Рақамли суд” концепциясини амалга ошириш доирасида қуйидагилар белгиланди:

• Судга ариза беришдан олдин, сунъий интеллект ёрдамида суд муҳокамасининг тахминий натижаси ва сарфланадиган харажатлар шакллантирилади;
• Мурожаатлар судга электрон шаклда юборилади;
• Ишда иштирок этувчи шахслар суд биносига ташриф буюрмасдан, масофадан туриб суд муҳокамаларида иштирок этади;
• Тарафлар ва ишда иштирок этувчи бошқа шахсларга суд жараёнларида ишга оид барча материаллар билан электрон шаклда танишиш имконияти яратилади;
• Суд харажатлари электрон шаклда ҳисобланади ва тўланади;
• Ижро варақалари автоматик равишда ижрога юборилади;
• Суд ишлари замонавий ахборот технологияларидан фойдаланган ҳолда тўлиқ электрон тарзда юритилади;
• Сунъий интеллект ёрдамида суд мажлиси баённомалари реал вақтда матн шаклида тайёрланади;
• Суд ҳужжатлари лойиҳалари автоматик шакллантирилади.

Тажриба тариқасида:

2025 йил якунига қадар Тошкент шаҳрида “Рақамли суд” концепцияси асосида иқтисодий, фуқаролик ва маъмурий низоларни кўришга мўлжалланган суд мажлис заллари ташкил этилади.

2026 — 2027 йилларда тажриба натижаларига асосан, концепция босқичма-босқич республикадаги барча судларда жорий этилади.

Б.Х.Полванов

Жиноят ишлари бўйича Оқдарё 

туман судининг раиси