БИР ИНСОН ЎЛИМИГА САБАБЧИ БЎЛГАН ҲАЙДОВЧИ

Вазирлар Маҳкамасининг 2022 йил 12 апрелдаги "Йўл ҳаракати қоидалари"нинг 77-бандида: "Ҳайдовчи ҳаракатланишнинг серқатновлигини, транспорт воситасининг ва юкнинг хусусияти ҳамда ҳолатини, йўл ва об-ҳаво шароитини, шунингдек, ҳаракатланиш йўналишидаги кўринишни ҳисобга олиб, транспорт воситасини белгиланган тезликдан оширмаган ҳолда хавфсизликни таъминловчи тезлик билан бошқариши керак. Тезлик ҳайдовчига ушбу қоидалар талабларини бажариш учун транспорт воситасининг ҳаракатланишини доимий назорат қилиб бориш имкониятини бериши керак. Ҳайдовчи транспорт воситасини бошқариш пайтида аниқлай олиши мумкин бўлган хавф юзага келса, у транспорт воситасининг тезлигини тўлиқ тўхтатишни таъминлайдиган даражада камайтириш чораларини кўриши керак", деб кўрсатилган. Шунингдек ушбу йўл қоидасининг 111-бандидаги -"тартибга солинган пиёдалар ўтиш жойларида ҳайдовчилар светофорнинг рухсат этувчи ишораси ёнган тақдирда ҳам пиёда(лар)га қатнов қисмини шу йўналишда кесиб ўтишни тугаллашига имкон беришлари керак", деб кўрсатилган.
Судланувчи Расулов Ҳамид (исми-шарифи ўзгартирилган), 2024 йил 30 июль куни соат 00:30 ларда Оқдарё тумани "Амир Темур" маҳалласи ҳудудидан ўтувчи М-37 автомобиль йўлининг "Бухоро-Самарқанд" йўналишини 35-километрида "YUTONG BUS" русумли автобусни бошқариб келиб, юқорида кўрсатилган талабларни қўпол равишда бузилишига йўл қўяди. У автомашинани   бошқариб бориш вақтида ўзидан олдинда қатнов қисмида мавжуд бўлган пиёдалар ўтиш йўлаги белгиси ҳисобланган белгиларни кўриб, автомашина тезлигини камайтириш имконига эга бўлсада, йўлни кесиб ўтаётган пиёда А.И.ни автомашинасининг олд қисми билан уриб юборади. Бунинг натижасида ҳайдовчи нафақат йўл-транспорт ҳодисаси содир этишга, балки бир инсоннинг оғир тан жароҳатлари олиб, оқибатда унинг  вафот этишига сабабчи бўлган.
Судланувчи Расулов Ҳамид Ўзбекистон Республикаси ЖК 266-моддасининг 2-қисмида назарда тутилган жиноятни содир этганликда айбли деб топилиб, у 2 йил муддатга транспорт воситасини бошқариш ҳуқуқидан маҳрум қилиниб, унга нисбатан 2 йил муддатга озодликдан маҳрум қилиш жазоси тайинланди.