Навоий бобомизни ўрганамиз

20-мактабгача таълим ташкилотининг тайёрлов гуруҳида тарбияланаётган жажжи ўғил-қизлар буюк мутафаккир шоир, ғазал мулкининг султони Алишер Навоийнинг 581 йиллигини кўтаринки руҳда нишонладилар. Сана муносабати билан ўтказилган тадбирда болажонлар Алишер Навоийнинг ғазаллари, рубоийларидан намуналар айтишди. Шунингдек, гуруҳ раҳбари Санобар Намозова ва мусиқа раҳбари томонидан тайёрланган Навоий бобомизнинг асарлари асосидаги саҳна кўринишлари ҳамда куй ва қўшиқларни кичкинтойлар зўр ҳаяжон билан ижро этдилар. Бу борада тайёрлов гуруҳи тарбияланувчиларидан Хонзода Исроилова, Шодиёна Собирова, Камолхон Давроновларнинг тадбирда фаол иштирок этганликларини алоҳида тилга олиб ўтиш жоиздир.
Шуни таъкидлаш керакки, тайёрлов гуруҳининг жажжи ўғил-қизлари тадбирга тайёргарлик кўриш жараёнида мутафаккир шоир Алишер Навоийнинг асарлари билан яқиндан танишар эканлар, буюк бобомизнинг ҳаёти ва ижодий фаолияти уларда катта таассурот қолдирди. Шунинг билан бир қаторда уларнинг қалбида Навоий бобомизга бўлган меҳр-муҳаббат ва уни ўрганишга бўлган қизиқиш уйғонди, десак адашмаган бўламиз. Зеро, ўзбек тилининг асосчиси, шеърият мулкининг султони Алишер Навоий меросини ўрганиш ва ўргатиш, пурмаъно асарларини болалар онгига сингдириш биз педагогларнинг муқаддас бурчимиздир.