Шеърият гулшани

Оқдарё ижодкорлари

Тўлғаной ГАДОЕВА - 1984 йилда "Ойтамғали" МФЙ Чим қишлоғида туғилган. 2001 йилда 7-мактабни тугатган. Мактабда ўқиб юрган чоғларидаёқ адабиётга, шеъриятга қизиққан Тўлғаной "Ёш адабиётчилар", Зулфия мукофотига номзодлар кўрик-танловларининг туман, вилоят босқичларининг ғолиби бўлган. Шеърлари туман, вилоят матбуотида чоп этилган, "Оқдарё овози" газетаси қошидаги "Навниҳол"ижодий клубининг аъзоси.

БОЛАЛИК СОҒИНЧИ

Узоқдан борарман уй томон шошиб,

Димоққа урилар соғинч сурури.

Болалик қайнайди умбалоқ ошиб,

Қишлоғим чангида қолган ғурури.

Шамолдек елади еллар сарсари,

Залвори тегрангда қўнган мисоли.

Оҳиста жилмаяр кенгликлар сари,

Болалик шаштида қолган тимсоли.

...Ҳув, ўша қизлардек яшадим хушҳол,

Қошимда ўсма-ю қўлларда хина.

 Ялпиз ифорида айламиш нушхол,

Яйрагин ўйнаб қол, жажжи қизгина.

Тунлар чўкканида юлдузлар санаб,

Ойнинг оғушида хаёлотимда.

Тушимда мен ўша малика бўлиб,

Учсам самоларда саман отимда.

Ширин сингилларим қўлидан тутиб,

Йиқилса опчидим, юзларин ўпиб.

Саҳарда бобомдан хўрозқанд кутиб,

Талпинган гўдакдек яландик тутиб.

Далага чоғландик наҳорда қайдам,

Билмам кенгликларда борму жозиба.

Баҳорда жалада ҳўл бўлдик сайдам,

Кечгача ўйнардик кўнгил ёзиб-а.

Бойчечак ниш урган кўнгилда шодлик,

Жилва нигоҳимда яралмиш зоҳир.

Баётимда  самар абадга ёдлик,

Зуҳрога салом-ла бош эгди Тоҳир.

Мангуга сазовор Лайли ва Мажнун,

Осмони фалакка яралмиш устун.

Мангу қолажакдир Тоҳир-Зуҳролар,

Бола бўлган ахир болалик бутун.

Соғинибман сени ушбу кун бешак,

Соғинибман жажжи тилло сочлигим.

Оғушингда тебранса оҳиста бешик,

Ҳаёт аталмишдир жило сочлигим. 

Тўлғаной ГАДОЕВА.