ЎЗ КАСБИНИНГ ФИДОЙИСИ

Туман Тиббиёт бирлашмасига қарашли Кўп тармоқли марказий поликлиникада тажрибали, фидойи шифокорлар кўплаб топилади. Улар орасида олий тоифали шифокор Ўткир Бекназаров номини алоҳида тилга олиб ўтиш ўринлидир. 1998 йилда Республика шошилинч тиббий ёрдам илмий маркази Самарқанд филиалида ўз иш  фаолиятини бошлаган қўли эм шифокор бугунги кунга қадар шу шифохонада ҳам ўз меҳнат фаолиятини давом эттириб келмоқда. Шу билан бир қаторда 2018 йилдан буён туман кўп тармоқли марказий поликлиникасида ҳам травматолог врач сифатида туманимиз аҳолисининг саломатлигини муҳофаза қилишда бор билим ва тажрибасини қўллаб келаётир.
- Болалигимдан шифокорлик касбига қизиққанлигим сабабли ўз касбимдан ҳамиша фахрланаман, - дейди Ўткир Бекназаров. - Шифокорлик нафақат билим талаб қилади, балки худо берган қобилият, шунингдек, ўз касбини ҳурмат қилиш, бемор билан хушмуомалада бўлишликни ҳам талаб қилади, деб биламан. Негаки, ширинсўзлик ҳам беморга катта малҳамдир. Дард билан курашаётган беморга аввало умид беришда унга хушмуомалалик билан муносабатда бўлиш беморнинг соғлигини тиклашда муҳим қадам эканлигини тажрибамдан кўп бор кузатдим ва бунга доимо амал қиламан. 
Шуни ҳам алоҳида таъкидлаш керакки, мамлакатимизда 12 ноябрь - "Тиббиёт ходимлари куни" байрами  сифатида кенг нишонланади. Фурсатдан фойдаланиб, тумандаги барча саломатлик посбонларини касб байрамлари билан чин юракдан қутлайман. 
Ўз ўрнида биз ҳам инсон саломатлигини асраш ва мустаҳкамлашдек олийжаноб ишга бутун умрини бағишлаётган туманимизнинг барча шифокорларига узоқ умр, оилаларига эса тинчлик ва хотиржамлик тилаб қоламиз.