Давлат мулкини талон-торож қилган фирибгарлар

Судланувчи Турдиева Тожинор (исми-шарифи ўзгартирилган), "Malika Eko Life" оилавий корхонасини ташкил қилиб, юртимизда тадбиркорликни кенг ривожлантириш учун яратиб берилган шарт-шароит ва имкониятлардан тўғри йўллар билан фойдаланиш ўрнига осон йўллар билан бойлик орттиришни ўз олдига мақсад қилиб олди. У ўзининг ғараз ва паст ниятларини амалга ошириш учун ҳар қандай йўллар билан бўлсада, ноқонуний даромад манбалари ва ҳажмларини ошириш мақсадини кўзлаб, корхона раҳбари Аннаев Мурод ва "Tulkin Super Business" МЧЖ жиноят ишини бир қисми ҳаракатдан тугатилган бошқа шахс билан ўзаро олдиндан жиноий тил бириктиришади. Улар бир гуруҳ бўлишиб, Ўзбекистон Республикаси Президентининг 16.06.2020 йилдаги "Хизматлар соҳасини қўллаб-қувватлаш чора-тадбирлари тўғрисида"ги ПҚ-4752-сонли Қарори талаблари асосида 21.08.2020 йилда "Mikrokreditbank" АТБ Лойиш филиали билан 3 йил муддатга йиллик 15 фоиз устама ҳақи тўлаш шарти билан аҳолига маиший хизмат кўрсатиш мақсадида тўқимачилик буюмлари      ва мўйна буюмларини ювиш ва кимёвий тозалаш ускуна ва жиҳозлар олиш учун 800.000.000 сўм кредит      маблағи ажратиш бўйича 1701-сонли кредит шартнома тузишади.
Кредит маблағларини ўзлаштириш мақсадида "Malika Eko Life" оилавий корхонаси билан "Tulkin Super Business" МЧЖ ўртасида 17.08.2020 йилда мўйна буюмларини ювиш ва кимёвий тозалаш ускуна ва жиҳозлар етказиб бериш бўйича 49-сонли шартнома ва 28.12.2020 йилдаги 15-сонли ҳисоб-фактурага асосан имтиёзли кредит маблағларини 03.09.2020 йилда 150 млн. сўм, 09.09.2020 йилда 50 млн. сўм, 11.09.2020 йилда 100 млн. сўм, 16.09.2020 йилда 200 млн. сўм, 18.09.2020 йилда 300 млн. сўмни "Tulkin Super Business" МЧЖ ҳисоб рақамига тўлов топшириқномалар асосида "кимёвий тозалаш ускуна ва жиҳозлар олиш учун тўлов" мазмунида кўчиришга эришиб, гўёки ўзларини қонуний тадбиркорлик фаолиятини амалга оширгандек кўрсатишади. 
Сохта тадбиркорлар ўзларининг жиноий режасига асосан аҳолига мўйна буюмларини ювиш ва кимёвий тозалаш хизмат кўрсатиш фаолиятини ташкил қилмасдан банк томонидан "Malika Eko Life" оилавий корхонасига ажратилган 800.000.000 сўм жуда кўп миқдордаги имтиёзли кредит маблағларини нақдлаштириб, ўзларининг шахсий эҳтиёжлари учун ўзлаштириш йўли билан талон-торож қилишган.
Судланувчи Турдиева Тожинор, Ўзбекистон Республикаси ЖК 167-моддаси 3-қисмининг "а" банди ва 228-моддаси 2-қисмининг "а,б" бандларида назарда тутилган жиноятларни содир этганликда айбли деб топилиб, унга 5 йил 6 ой муддатга озодликдан маҳрум қилиш жазоси тайинланди.
Судланувчи Аннаев Мурод, Ўзбекистон Республикаси ЖК 167-моддаси 3-қисмининг "а" банди ва 228-моддаси 2-қисмининг "б" бандида назарда тутилган жиноятдарни содир этганликда айбли деб топилиб, унга 5 йил 6 ой муддатга озодликдан маҳрум қилиш жазоси тайинланди.