ОШХОНАЛАРДА НИМА ГАП?

Туман марказидаги ошхоналарнинг бирига дўстларимиз билан тушликка чиқдик. Ёнимизга хизмат қилиш учун кўринишдан 15-16 ёшлардаги бир қизча келди. У нима буюришларимизни сўради. Биз ундан айни вақтда нима учун мактабда эмаслигини ва бу ерда нима иш билан шуғулланишини сўрадик. У мактабларнинг бирида 11-синфда ўқиётганлигини, мактабга бормасдан репетиторга қатнаб кундуз куни соат 14:00 гача ошхонада меҳнат қилишини, шунга яраша ҳақ олишини айтди. Бу манзара кўпчиликка оддий ҳолат бўлиб кўриниши мумкин. Бироқ жиддий ўйлаб кўрилганда ҳали балоғатга етмаган қиз ошхонада ароқ ичаётганларга ҳам, ахлоқи бузуқларга ҳам хизмат қилишга мажбур. Шундай қилмаса ошхона эгаси унга пул тўламайди. Ахир бу билан биз ёш қизларимизни ҳаётини заҳарлаб қўймаяпмизми? Айни мактабда ўқиши керак бўлган қизнинг ошхонада эркакларга хизмат қилиб юришини қандай тушуниш керак?
Ўзбекистон Республикасининг "Маъмурий жавобгарлик тўғрисида"ги Кодексининг 49- моддасида вояга етмаган шахс меҳнатидан унинг соғлиги, хавфсизлиги ёки ахлоқ-одобига зиён етказиши мумкин бўлган ишлардан фойдаланиш - фуқароларга энг кам иш ҳақининг бир баробаридан уч баробаригача миқдорда жарима солишга сабаб бўлади дейилган. Афсуски, бу қонунни аксарият ошхона эгалари билишмайди. Агар билишган тақдирда ҳам умуман амал қилишмайди. Сабаби айнан бу масала билан уларни текширадиган ва назорат қиладиган бирорта ташкилотнинг ўзи йўқ. Бу эса вояга етаётган фарзандларимизнинг келажагини хавф остига қўймоқда. Буни тушунтирадиган ва тегишли мутасаддиларга айта оладиган ташкилотлар қачон уйқудан уйғонишади?