"БИТИРУВ ОҚШОМИ" ҲАҚИДА ЎЙЛАР

Мактабларда бўлиб ўтадиган "Сўнгги қўнғироқ" куни халқ таълими тизими, маҳалла фаоллари, ҳуқуқни ҳимоя қилиш идоралари, жамоатчиликнинг бутун диққат-эътибори ўқувчи йигит-қизларга қаратилган бўлади. Негаки, умумтаълим муассасаларида ўқув йили тугаши муносабати билан ресторану кафеларда алоҳида кечалар ташкил этилишига йўл қўймаслик борасида мактаб ва коллежларда қайта-қайта тарғибот олиб борилса-да, бу ишлар ҳамон давом этаётгани ачинарли. Муаммонинг ечими, шубҳасиз, таълим муассасалари мутасаддилари, ўқитувчилар ва ота-оналарга бориб тақалади. 
Битирув оқшомидаги яна бир ортиқча харажат - синф ўқитувчиси ёки гуруҳ раҳбарига қимматбаҳо совға-саломлар олиш. Ўқувчилар, баъзи ота-оналар уни силлиқлаб, "кўнгилдан чиқарганимиз", деб қўяди. Бу билан гўёки ўзларини оқлашга уринишади. Ахир, бундай беҳуда чиқимга кимнингдир қурби етмаслиги мумкин-ку?!  Тўғри, ҳалол устозлар жуда кўп. Бироқ гуруч курмаксиз бўлмаганидек, ўқувчилардан совға талаб қиладиганлар ҳам борлиги дилни ғаш қилади. 
-  Бу йил қизим мактабни битиради,- дейди маҳалладошим. - У "Сўнгги қўнғироқ" тадбиридан сўнг синфдошлари билан "Битирув кечаси"ни давом эттиришини айтди. Мен бунга тўсқинлик қилдим. Аммо кўпчилик ота-оналар бу кунни ўзгача айём сифатида нишонлашни истаб, маблағ ҳақида келишиб олишган. Бундан ташқари, ўқитувчиларга совға улашиш ҳам йўқ эмас. Қолаверса, кафе ёки ресторанда овқатланиш, янги кийим-кечак, соч турмаги, йўл харажати учун ҳам маблағ керак. Бу пуллар боланинг саломатлиги ва ўқиши учун ишлатилса, фойдалироқ бўларди. 
Фарзандларнинг кичик ёшдан беҳуда ҳою ҳавасларга берилишига катталар сабабчи бўлади. Мактабгача таълим муассасасини тарк этаётган болакайнинг хайрлашув оқшоми учун ҳам қанча оворагарчилик бўлаётгани сир эмас. Айтишларича, мактабгача таълим муассасаларида бўлиб ўтадиган "Хайр, боғча, салом, мактаб!" тадбири учун  ҳам фалон сўмдан йиғишяпти.
- Нуроний онахону отахонларнинг ҳаётий қарашлари ўқувчилар учун жуда қизиқ, - дейди тажрибали ўқитувчи Э.Қаршиева. - Эътиборлиси, ўқув йилининг бошида мен таълим олган 2-мактабнинг 100 йиллиги муносабати билан "Эътироф" номли китоб чоп этилиб, мактабни 50-60 йил олдин битирган собиқ ўқувчилар ва айни пайтда жамиятимизнинг турли жабҳаларида фаолият кўрсатаётган турли хил касб эгаларининг ҳаётий тажрибаси, хотиралари ва мактабнинг тарихига оид маълумотлар ёритилди. Бу китоб туманимиз миқёсида биринчилардан ўз фаолиятини бошлаган мактабимизнинг шонли 100 йиллик тарихини ўз ичига олганлиги билан муҳим аҳамиятга эгадир. Шу муқаддас даргоҳни тугатиб, айни пайтда ўзининг педагоглик фаолиятини олиб бораётган шогирдларимизнинг биз билан ёнма-ён иш юритаётганлиги ҳам ёш авлод учун ибрат мактабидир.
Дарҳақиқат, ортиқча дабдабабозлик ва ортиқча чиқимларга чек қўйиб, ўғил-қизларга дўстлик ва бирдамлик ҳақидаги фильмларни кўрсатиш, тарихий қадамжоларга саёҳат уюштириш, китоб марафонларига жалб этиш ва қизиқарли учрашувлар ўтказиш орқали улар маънавияти бойитилса, мақсадга мувофиқдир.
Мамлакатимизнинг кўпгина мактабларида педагогик жамоанинг ташаббуси билан таълим-тарбияга алоқаси бўлмаган дабдабали байрамона кечалар ўтказилмаётганлиги ҳам бизни қувонтиради. Болалар китоб марафонлари, саёҳат дарслари ва бадиий учрашувлар билан банд бўлиб, уларнинг онгу шуурига ҳақиқий маънавий бойлик фақат илм эгаллаш экани сингдирилмоқда. Ўқув йили якуни арафасида мазмунли тадбирлар уюштирилиб, мактабнинг  40-50 йил аввалги битирувчилари билан учрашувлар ўтказилмоқда. Кейинги йилларда ўтказилаётган "Уч авлод" учрашуви ҳам ана шундай хайрли анъаналаримиздан бирига айланиб бораётир. 
Гулсара ТИНИБЕКОВА.