ОЗИҚ-ОВҚАТ НАРХЛАРИ СИЗНИ ҚОНИҚТИРАДИМИ?

Бугунги кунда бозорларда 1 килограмм картошканинг нархи 4-5 минг сўмни ташкил этаяпти. Сабзининг нархи эса 5-6 минг сўмга етиб қолди. Шундай савол туғилади. Нима учун аҳоли энг кўп истеъмол қиладиган озиқ-овқатларнинг нархи бу даражада қимматлашиб кетди. Бунга сабаб нима? Бизнингча, картошка-сабзининг нархи ошиб кетишига асосий сабаблардан бири кейинги йилларда аҳоли хонадонларида бу экинларни экиш ишларига эътибор камайди. Негаки, бундан 4-5 йил муқаддам картошканинг ўртача нархи 500 сўмга тушиб қолган эди. Натижада деҳқонлар ўзлари етиштирган ҳосилни харажатини ҳам қопламасдан банкрот даражага тушиб қолганди. Биргина Узунқишлоқ маҳалласининг Холдор қишлоғида яшовчи аҳоли томонидан нафақат туманимиз бозорини балки, Каттақўрғон шаҳри ва Навоий вилояти бозорларини бу маҳсулот билан таъминлаш имконияти мавжуд эди. Юқорида айтганимиздек, картошка нархининг тушиб кетганлиги туфайли деҳқонларимизнинг ўзлари ҳам экмай қўйишди. Эшитишимизга қараганда айни пайтда республикамизга Эрон, Покистон сингари давлатлардан картошка олиб келинаётган экан. Албатта, бу дилни хира қиладиган ҳақиқатдир. Чунки шундай гўзал юртда яшаб, ери олтинга тенг жойда меҳнат қилиб, наҳотки ўзимизни ўзимиз картошка билан таъминлай олмасак. Халқимизда картошка - иккинчи нонимиз деган нақл бежизга айтилмаган-ку. 
Туманда сабзавотчиликка ихтисослаштирилган фермер хўжаликларида ҳам картошка етиштириш йўлга қўйилган, деган гапларни эшитаяпмиз. Агар бу гап рост бўлса, нега фермерларимиз томонидан етиштирилган маҳсулот бозорларимизга олиб чиқилмаяпти? Бу борада туман қишлоқ ва сув хўжалиги бошқармаси, қолаверса фермер ва томорқа ер эгалари кенгаши раҳбарлари етарли фаолият кўрсатишлари талаб этилади. Ана шундагина бозорларимизда етиштирилган маҳсулот нархи анча арзон бўлади. Буни асло унутмаслик керак.

Йўлчи МУҲАММАДИЕВ,