Фақат алиментчи эркаклар айбдорми?

Кейинги пайтларда оммавий ахборот воситаларида ва ТВ каналларида оилавий ажримлар сони ошиб бораётганлиги ачиниш билан тилга олинаяпти. Ўтган йилнинг ўзида мамлакатимиз бўйича 30 мингдан ортиқ ажримлар юз берганлиги мутахассислар томонидан тез-тез айтилмоқда. Агар статистикага назар ташлайдиган бўлсак, оилавий ажримларда кўпроқ ким айбдор, деган савол туғилиши табиий ҳол. Тўғрисини айтганда бунда эр ҳам, хотин ҳам айбдор эканлигини гувоҳи бўляпмиз. Сабаби оила қуришга тайёр бўлмаган айрим қизларимиз турмушга чиққач, ўзларининг "қилиқларини" тўла намоён этишаяпти. Чунки олдин эркинликда юрган эркатой қизларимиз эрини оиласига, ота-онасига ва яқинларига хизмат қилишни ўзларига ор деб билишмоқда. Бунга мисоллар бисёр. Айрим келинларнинг ўз эрларига хиёнат қилашаётганликлари эса кечириб бўлмас ҳолдир. 
Яқинда оилавий можаро бўйича суд мажлисида иштирок этишга тўғри келди. Куёвнинг онаси ўз сўзида келинининг икки боласи бўла туриб, бошқа эркак билан кўнгилхушлик қилиб юрганлигини, унинг бу қилиғини ўғли ҳам кечира олмаслигини айтиб, никоҳни бекор қилишни сўради. Судда иштирок этган келин ҳам қайнонасининг сўзини тасдиқлади. У бундай буён никоҳдаги эри билан яшай олмаслигини, агар никоҳ бекор қилинса, ўша топишгани билан оила қуришни уялмай айтишга журъат этди. Натижада суд уларнинг никоҳини бекор қилишга қарор чиқарди. Қарорда ҳам эркак икки боласи учун ойма-ой алимент тўлашлиги таъкидланди. Хўш, бу адолатданми? Агар турмуш ўртоғи унга хиёнат қилаётган бўлса томошабин бўлиб туриши керакмиди? Бундан ташқари ажралиш айнан аёллар томонидан, уларнинг ташаббуси билан амалга оширилаяпти-ку. Бу ерда эркакнинг ҳеч қандай айби йўқ-ку. Фақатгина у емаган сомсасига пул тўлаяпти, холос.
Яна битта мисол. Қўшни қишлоқда яшовчи бир танишимнинг ўғли уйлангач, учта фарзандли бўлди. Шундан сўнг, келин болаларини ташлаб Туркияга кетди. Орадан икки-уч йил ўтса ҳам қайтмади. Турмуш ўртоғи бўлган эри эса бу орада ажралиш учун судга мурожаат қилди. Шунда ҳам алиментни тўлагандан сўнг судга келиши айтилди. Энди ўзингиз ўйлаб кўринг. Аёл болаларини ташлаб, хорижга кетиб ўзи билганча яшаса-ю, бу ерда қолган эри алимент тўлаб болаларини боқса. Бу адолатданми? Бундай мисолларни ўнлаб келтириш мумкин. Шунинг учун қонунларимизга ўзгартириш киритиш лозимга ўхшайди. Агар ажралиш аёлнинг айби билан юз бераётган бўлса, эркак томонидан алимент тўлашни тўхтатиш керак. Иккинчидан эса ажралмасдан хорижга чиқиб кетаётган фарзанди бор аёлларни мамлакатдан чиқармаслик ниҳоятда лозим. Ана шундагина бу борада тенглик пайдо бўлади. Ҳозирга пайтда эса биз гендер тенгликни баҳона қилиб аёлларга кўпроқ эркинлик бериб эркакларнинг ҳуқуқини поймол қилаётганга ўхшаймиз. Жамиятимизда ва қонунларимизда эркак билан аёлнинг ҳуқуқи тенг экан, гендер тенглик ҳам шунга яраша бўлиши керак эмасми? Бу борада Олий Мажлис депутатлари ва сенаторларимиз жиддий ўйлаб кўришларини истардик. Чунки кейинги пайтларда миллий қадриятларимизга мос келмайдиган тарзда оилавий ажримлар кўпайиб бораяпти. Бунга чек қўйиш учун эса юқоридаги таклифларимиз амалда қўлланилиши лозим.