ҲАР НАФАСДА УЙҒОҚ САНЪАТКОР

Инсоннинг умри қанча яшагани билан эмас, балки қандай яшагани билан ўлчанади. Баҳодир Тожиев ҳам ана шундай элнинг ҳурматига сазовор бўлган ёш санъаткор эди. У 1986 йилнинг 7 май куни Истиқлол маҳалласининг Тангиравот қишлоғида туғилганди. Яқинда оғир хасталик туфайли бу ёруғ оламни тарк этди. Соҳирнафас хонанда умрининг сўнгги кунларида худди ўзи сезгандек шошиб елиб юрди. Янгидан-янги қўшиқлар устида ишлаётганди. "Она сени унутганим рост", "Ҳовли" сингари қўшиқлари элга манзур бўлди. Баҳодир Тожиев туманда ўтказиладиган тадбир ва байрамларда фаол қатнашар, масъулиятни юракдан ҳис этар, берилган вазифани тўла-тўкис бажариш учун тиниб тинчимас ҳамда ўз устида мунтазам ишлашни хуш кўрар эди. Ҳа, у қисқа умр кўрди. Лекин унинг ибратли ҳаёт йўли ҳар нафасда уйғоқдек албатта. Санъаткорнинг қўшиқлари эса шогирдлари ва дўстлари томонидан ҳамиша куйланишига ишонамиз. Баҳодир Тожиевнинг порлоқ хотираси тумандошларимиз қалбида мангу яшайди.