Жиноят ва жазо ФИРИБГАРЛИКНИНГ ПАЙИ ҚИРҚИЛДИ

Судланувчи Ботиров Солижон асли хоразмлик. У эндигина 30 ёшни қаршилаётган бўлсада ҳаёти давомида бир неча маротаба судланган бўлишига қарамасдан яна такрор-такрор жиноятга қўл урди. У хавфли рецедивист бўла туриб, ўзганинг мулкини қўлга киритиш мақсадида Иштихон тумани, "Тойтуёқ" маҳалла фуқаролар йиғинида яшовчи М.К.га Америка Қўшма Штатларига ишга юборишини айтиб, виза, авиачипталар ва иш ўрни топиб бериши ҳақидаги ёлғон ваъдалар билан унинг ишончига киради. 2022 йил апрель ойининг бошларида 4.000 АҚШ долларини қўлга киритиб, уни хорижий давлатга ишга юбормасдан, алдов йўли билан қўлга киритилган ўзганинг кўп миқдордаги жами 101.643.060 сўмга тенг бўлган 9.000 АҚШ доллари миқдоридаги пулларни ўзининг эҳтиёжлари учун ишлатиб юборган.
Бундан ташқари, судланувчи Ботиров Солижон ўзининг жиноий ҳаракатларини давом эттириб, ўзгани ишончини суиистеъмол қилиш йўли билан қўлга киритиш мақсадида, Иштихон тумани, "Чақар" маҳалла фуқаролар йиғинида яшовчи Қ.Ў.ни ишончига кириб, 2022 йил апрель ойининг охирларида 5.000 АҚШ долларини қўлга киритиб, уни хорижий давлатга ишга юбормасдан, алдов йўли билан қўлга киритилган жами 55.899.000 сўмга тенг бўлган 5.000 АҚШ доллари миқдоридаги пулларни ўзининг эҳтиёжлари учун ишлатиб юборган.
Шунингдек, судланувчи С.Ботиров, Иштихон тумани, "Янгикент" маҳалла фуқаролар йиғинида яшовчи Б. М. 4.000 АҚШ доллари миқдоридаги пулларини, Иштихон тумани, "Янгикент" маҳалла фуқаролар йиғинида яшовчи Х.М. 5.000 АҚШ доллари миқдоридаги пулларни ҳамда Хоразм вилояти, ҳазорасп тумани, "Ғ.Ғулом" маҳалла фуқаролар йиғинига қарашли "Карвак" қишлоғида яшовчи  А.К.нинг жами 1.500.000 сўм миқдоридаги пулларни фирибгарлик йўли билан қўлга киритиб, ўзининг эҳтиёжлари учун сарфлаб юборган.
Судланувчи Ботиров Солижонга Ўзбекистон Республикаси ЖК 168-моддаси 3-қисмининг "а, б" бандлари билан, ЖК 57-моддасини қўллаб, 5 йил беш ой муддатга озодликдан маҳрум қилиш жазоси тайинланди.

И.Дониёров 

жиноят ишлари бўйича туман судининг раиси.