ШОИР МУҚИМИЙНИНГ ҚАБРИ ҚАЕРДА?

Ўзбек мумтоз адабиётининг йирик вакилларидан бири бўлган Муҳаммад Аминхўжа Муқимий (1850-1903) бир умр Қўқон шаҳрида яшаб ижод қилганлигидан кўпчилик хабардор. Мактаб дарсликларида ҳам Муқимий ҳақида ва унинг асарлари ўқувчиларга тақдим қилинган. Айниқса, унинг "Саёҳатнома", "Танобчилар", "Масковчи бой таърифида" сингари асарлари ҳозиргача севиб ўқилади. Ўнлаб ғазаллари хонандаларимиз томонидан куйланмоқда. Бир сўз билан айтганда, шоир ҳар қанча таърифга, эҳтиромга лойиқ эканлигини алоҳида таъкидлашимиз керак.
Ўтган йилнинг август ойида Фарғонанинг Учкўприк туманида яшайдиган курсдош синглимизнинг хонадонида меҳмонда бўлдик. Бир неча кун давомида водийнинг хушманзара жойларини, хусусан, Қўқон шаҳридаги Худоёрхон саройини томоша қилдик. Саёхат давомида мезбонлардан улуғ шоир Муқимийнинг қабри қаерда эканлигини сўрадик. Афсуски, бу саволимизга жавоб топа олмадик. Ваҳоланки, Қўқон туризм шаҳри экан, бу ерга келадиган сайёҳлар, айниқса, ижодкорлар саёҳати давомида буюк шоирнинг қабри қаерда эканлигини билишса, зиёрат қилишарди. Бу бор гап. Шундай экан, шаҳарда яшайдиган ва нуфузли ташкилотларда ишлайдиган масъул биродарларимиздан шоир Муқимийнинг қабри қаерда эканлигини аниқлаб, босма нашрларда, оммавий ахборот воситаларида эълон қилишларини сўрардик. Бундан ташқари, Қўқон ўнлаб ўзбек адабиётига муносиб ҳисса қўшган улуғ шоирларга бешик бўлганлигини ҳам яхши биламиз. Шу боис қолган шоирларнинг   қабрлари қаердалигини ҳам аниқлаш жуда муҳим эканлигини таъкидлашни истардик. Ўйлаймизки, қўқонлик ҳамкасбларимиз бу масалада ташаббус кўрсатадилар.