MAKTAB TOMON ILK QADAM…

Shogird maktab tomon qadam tashlar ekan, endi ustozi qanaqa inson ekanligi haqida tinmay o'ylardi. Yuragi hapriqar, goh qo'rquvdan, goh quvonchdan titrardi. Eshik oldida ko'zlari mehrga to'la ustozi kutib olgach, shubhalari tarqab ketdi. Birinchi ustozini qo'llaridan tutib, maktab sari qadamlarini tashlar ekan, u juda xursand edi. Kunlar o'taverdi, ustozi esa har bir bolaning savollariga javob berishdan sira charchamasdi. Joyiga bir daqiqa ham o'tirmas, partalar o'rtasida tinmay hali u o'quvchisiga, hali bunisiga nimalarnidir  tinimsiz o'rgatardi. Bolajonlarning jajji qo'lchalaridan ushlab yozishga, o’qishga o'rgatardi. Hech ham charchamasdi. "Nahotki, ustozim dam olmasa. Charchamadimikan-a?" Hayron qolardi o'zicha. Lekin u bilmasdi ustozlik kasbi qanchalar mas'uliyatli va sharafli ekanligini. Ustoz degan zot jonkuyar va mehrli ekanligini. Ilm manbasini shogirdlariga ulashmasa ko'ngli to'lmasligini. Har bir farzandini o'z farzandidek yaxshi ko'rishini. Kunlar o'tib, yillar o'tib bularning barchasini bildi, his qildi. Shunda cheksiz mehr tushdi aziz ustoziga.
…Biz ham barchamiz aziz ustozlarimizni unutmaymiz, albatta. Ayniqsa, ilk taasurotlarimiz sababchisi birinchi ustozimizni, shirin хotiralarga boy bolalik chog'larimizni hech ham unutolmasak kerak. 
Aziz ustozlarim, sizga cheksiz ta'zim qilsak arziydi. Qarang! Siz tomon yangi shogirdlar, jajji bolajonlar shoshmoqda. Sizdan ilm-ma'rifat olish, ilm zinalaridan odimlab chiqish uchun. Shoshiling! Ana chalinmoqda qo'ng'iroq ovozi. Bu ko'pchilik kutgan birinchi qo'ng'iroq…
Shogirdlari, kelajagimiz vorislari bo'lgan yosh avlodga ta'lim-tarbiya berishdek mas'uliyatli, ammo sharafli vazifani o'z zimmasiga olib, jamiyatimizga, ona Vatanimizga munosib farzandlar qilib yetishtirish yo'lida astoydil xizmat qilayotgan barcha ustozlarimizni, fidoyi xalq ta'limi xodimlarini Mustaqilligimizning 30 yilligi bayrami bilan samimiy muborakbod etaman. 
                                                  Dilfuza Qurdosheva.