Самимий дўст, мерибон ота дейишарди

Ғофурни кўп йиллардан буён яхши танирдим. Чунки унинг отаси Қосим Мамадолиевни бундан қирқ йиллар муқаддам хўжаликда бригада бошлиғи вазифасида фаолият кўрсатаётган даврда илғорлиги учун газетада кўп бор ёритгандим. Аниқроқ қилиб айтадиган бўлсам Қосим акани хонадонида кўп бор меҳмон бўлгандим. Ўша кезларда ҳам камгап, самимий йигит бўлган Ғофур билан суҳбатлашардик. Суҳбат давомида у ўзининг орзулари ҳақида мароқ билан сўзларди. Отаси изидан бориб деҳқончилик сирларини қунт билан ўрганаётганлигини, келгусида фарзандларини элга нафи тегадиган инсон бўлишини бот-бот такрорларди. Ана шу инсоннинг яқинда оламдан ўтганлигини эшитиб очиғини айтганда, юрагим эзилди. Чунки эндигина олтмиш ёшга кириб фарзандлар ва набиралар даврасида пенсия гаштини сураман деган бир пайтда шафқатсиз ўлимнинг бевақт келганлиги оила аъзоларини ҳам юрак бағрини эзиб юборди. Тўрт қиз ва бир ўғилни вояга етказган Ғофур Қосимов оилада ҳам меҳрибон ота эди. Барча фарзандларини ўқимишли қилишга қатъий бел боғлаб, бу орзуларини амалга оширди, дейиш мумкин. Тўнғич фарзанди Хуршида 34-мактабда инглиз тили фанидан сабоқ бераётган бўлса, қизи Гавҳар 8-умумтаълим мактабида она тили ва адабиёт фанидан ўқувчиларга билим бермоқда. Қизлари Ноила тикувчи, Ўғилой тадбиркорлик билан шуғулланаётган бўлса, ўғли Баҳодир Тошкент Ахборот технологиялар университети Самарқанд филиалининг бешинчи курсида таҳсил олмоқда. Барча фарзандлари элимизга беминнат хизмат кўрсатаётганликларини алоҳида таъкидлаш керак.
- Отам барчамизга меҳрибон эди, - дейди қизи Гавҳар суҳбат пайтида.          
- Бизни ҳамиша китоб ўқишга, фарзандларимизни ўқимишли қилиб тарбиялашга даъват этарди. Отамнинг васиятларини амалда бажаришга, у кишига муносиб фарзанд бўлишга ҳаракат қиламиз. 
Инсон умрини оқар дарёга қиёслашади. ар бир киши ҳаётда яшар экан, инсонларга яхшилик қилишга интилиши, ортидан салоҳиятли, халқ корига ярайдиган фарзандлар қолдириши керак. Марҳум Ғофур Қосимов ҳам айни пайтда орамизда бўлмасада, меҳнатсевар фарзандлари унинг ишини давом эттиришмоқда.