Оқдарё ижодкорлари Бир қатра шеъримга ҳамдард топилса, Дунё топганимни айланг эътироф

Султон Нарзи (Султон Нарзиев)- 1950 йил 21 декабрда Оқдарё тумани Примкент маҳалласи, Ниёз қишлоғида туғилган. 1974 йилда СамДУнинг рус тили ва адабиёти факультетини тугаллаган. 1974-77 йилларда туманимизда чоп этиладиган "Ленинизм йўлидан"(ҳозирги "Оқдарё овози")газетасида фаолият кўрсатган. С.Нарзиев агар ҳаёт бўлганида 75 ёшни қаршилаётган бўлар эди. Минг афсуски, 2016 йилда шафқатсиз ўлим С.Нарзиевни орамиздан олиб кетди.
Султон Нарзи - мутолаага, ижодга, айниқса, шеъриятга ошно қалб эгаси эди. Ижодкорнинг 2008 йилда "Поёнсиз даман", "Идрок", 2009 йилда "Рангин рақам" деб номланган китоблари Тош-  кентдаги "Vektor-Press" нашриётида чоп этилган.
Муаллифнинг мазкур китоблари тўртликлардан ташкил топган бўлиб, уларда шоирнинг ўқиган-билганлари, кўрган-кечирганлари, хуллас, ҳаётий тажрибалари ўз ифодасини топган. Тўртликларда меҳнатсеварлик, ростгўйлик, она-Ватанни севиш, уни кўз қорачиғидек авайлаш, табиат манзаралари, экология муаммолари, шунингдек, одоб-ахлоқ, меҳр-оқибат ҳақида фикр юритилади.
Қуйида газетхонларимизнинг илтимосига кўра,  оқдарёлик шоирнинг ижод маҳсулидан намуналар келтирдик. Тўртликлардан таркиб топган ушбу ижод намуналари ўқувчиларнинг маънавий-эстетик оламини бойитишига ишончимиз комил.
ТЎРТЛИКЛАР
Бошга оқ булут ёпинган тоғда,
Оламни муаттар айлаган боғда,
Айни қизғалдоқлар очилган чоғда,
Жаннат ҳавас қилур Ўзбекистонга!
           ***
Дўст қайда, эл билан ҳамюз бўлмасанг,
Эл қайда, барчага ўз-ўз бўлмасанг.
Ҳаёт йўқ майдонин саҳна деб билмай -
Ниқоблар масхида кўз-кўз бўлмасанг.
             ***
На қилдинг Дилором, шамга ўт ёқиб,
Ўчирмоқ истадинг самога боқиб.
Тун бўйи милдираб сизди-ку ёшлар,
Тонг отса кўзлар ҳам тушади оқиб.
             ***
На замин, на юлдуз, наки каҳкашон,
На Раҳмон, на шайтон, на Дукчи эшон,
Ҳеч нима, ҳеч кимга тингилма, эй дўст,
Ўзингга, ўзингга, ўзингга ишон!
               ***
Ҳаётинг қийнаса олиб аксига,
Курашиб яшайвер қасдма-қасдига.
Кун ботиб тонг отар, айланар дунё,
Ният холис бўлса қайтар аслига.
         ***
Энтикдинг, шодликлар бошингда қуюн,
Яшаш пардек енгил, ҳаётинг - ўйин.
Дўст-душман кўзингга кўринар якранг,
Ҳаддингдан зиёда бахт ҳам бир афюн.
***
Сабо гул юзидан юваркан ғубор,
Бағридан жой олар муаттар ифор.
Ҳар эзгу рафторинг бадалсиз эмас,
Олган нафасингда мукофоти бор.
       ***
Баҳри муҳит узра сузар бир қайиқ,
На замин, на юлдуз, фақат сув ёйиқ.
Умид ва қўрқувдан иборат дунё,
Чекингга на тушса, сен шунга лойиқ.
***
Фоний дунё инсон зотин ютмоққа мойил,
Лаҳза-лаҳза ғалабалар хотироти йил.
Улуғ мақсад иродага бўлганда пайванд,
Бир киши ҳам қила олур жаҳонни қойил.
        ***
Борлиқ интилади янгилик сари,
Нурдан сайқал берар дунё саҳари.
Ҳатто ўлим келса қайғураверманг,
Бу олий вужуднинг янги асари.
         ***
Тобора ҳаволаб бормоқда варрак,
Ерни титратгудай урмоқда юрак.
Токи тугаб битмас умрнинг ипи,
Ҳаёт иқболига югурмоқ керак.
           ***
Дилинг тоза бўлсин, сақламасин кин,
Қўпол сўз бузмасин фасоҳат чокин.
Ноўрин туйғуга сира эрк берма,
Нодонлик - жиззаки, донолик - сокин.
***
Насабим улуғ деб керилма, эй зот,
Неча бор шоҳ бўлган, қул бўлган бот-бот.
Ҳар кимнинг маҳрига тушганда ҳаёт -
Фақат ўз саъйидан маъно олур от.
               ***
Бировнинг ҳаққидан ҳазар қил қўлим,
Балои нафс эрур инсонга ўлим.
Оз олдим гуноҳга ботмадим дема,
Кам-камдан улғайди золим ва зулм.
              ***
Хоҳишинг юзингга тортади қамчи,
Ўз умринг бўйнингга бўлар арғамчи.
Ҳаёт тузоғини туну кун тўқиб,
Охир ўз тўрида ўлар ўргамчи.
        ***
Эй тезоқар дарё, айлагил шитоб,
Яна манзилингга элтиб қўяр бод.
Биз сенсиз ҳаётни эплай олмаймиз,
Йилда бир баҳорни берамиз барбод.
          ***
Бир гулда ҳаётнинг жами мужассам,
Мужассам бир гулда ҳаёт эрур жам.
Гул деб хазон бўлма умримиз боғи,
Яна боғ кўкаргай гулдан жамулжам.
             ***
Гўзал Ўзбекистон гулзорга мавсум,
Она Ер юзида бўстон - табассум.
Жаҳонда гул, гулзор кам эмас бироқ,
Чаманзор қайда бор бу каби маъсум.
               ***
Мендек бир фақирга на ҳожат сарроф,
Танқид кор айламас, мева бермас лоф.
Бир қатра шеъримга ҳамдард топилса,
Дунё топганимни айланг эътироф.
 Султон НАРЗИ