ТААССУРОТЛАРИМИЗ БИР ОЛАМ

Самарқанд... Менинг туғилиб ўсган, илк қадамларимнинг гувоҳи бўлган,онамдек азиз ва мўътабар шаҳрим. Яқинда қадр-дон шаҳримга яна ташриф буюриш бахти насиб этди менга. Бу галги сафаримда дугонам Ойгул Суюндиқова ҳамроҳим бўлди. Биз яна бир қадрдонимиз Ойгул Маматованинг қилаётган эзгу ишини ўз кўзларимиз билан кўриш учун Оқдарё туманига бордик. Дастлаб Ойгулнинг хонадонида меҳмон бўлдик. Меҳмондорчилик жуда мароқли ва эсда қоладиган даражада бўлди. Дугонамиз ташаббуси билан ташкил этилган ансамбль қизлари ўзларининг миллий руҳдаги куй ва қўшиқлари, жозибали рақслари, ўз ижодларидан намуна  шеърлари билан даврага ўзгача бир жозиба бахш этишди. 
Кўтаринки руҳда ўтаётган саёҳатимиз Тоҳир ва Зуҳра зиёратгоҳига ташрифимиз билан давом этди. Зиёратгоҳни ободонлаштириш лойиҳаси устида иш олиб бораётган шоира ва ёзувчи Ойгул Маматова келгусидаги режалари ҳақида ҳикоя қилиб берди. Бу ердан олган тассуротларимиз эса қалбимизга ўзгача бир ҳаяжон ва эзгу туйғулар солди. Биз муҳаббат остонасидаги ҳис  туйғуларимизни беихтиёр сатрларга жойладик:
Оқдарёда оқаётир Тоҳир руҳи,
Тўлқинлардан маржон тақиб сандиғига.
Ишқ куйини куйлаётир азим дарё,
Даво бўлиб ҳижронли дил чандиғига.
Зуҳро руҳи кезар кўм-кўк далаларда,
Муҳаббатнинг, садоқатнинг рамзи бўлиб.
Қора Ботир наъра тортган паллаларда,
Юрагим ҳам армонларга кетар тўлиб.
Оқдарёда оқаётир Тоҳир руҳи...
  Саодат Донабоева.