“Оқдарёнинг ҳақ овози” китобининг тақдимоти КИТОБ ТАҚДИМОТИ ФАЙЗЛИ ЎТДИ

  Ўзбекистон Журналистлар уюшмасининг аъзоси, “Йилнинг энг фаол журналисти” Республика танловининг ғолиби, “Оқдарё овози” газетасининг бош муҳаррири, устозимиз Йўлчи Муҳаммадиевнинг ҳозирга қадар уч қисмдан иборат “Оқдарё фарзандлари”, икки қисмдан иборат “Оқдарё баёзи”, “Қайтиш” ҳикоялар тўплами, “Туҳмат гирдоби” қисса ва ҳикоялар тўплами нуфузли нашриётларда чоп этилиб, китобхонлар томонидан муносиб кутиб олинган. Ўтган йили “Маҳалла” телеканали орқали муаллифнинг бир неча қисса ва ҳикоялари асосида видеофильмлар суратга олиниб намойиш этилди. 
  Яқинда Тошкентдаги “Матбаачи” нашриётида устозимизнинг “Оқдарёнинг ҳақ овози” номи билан аталувчи китоби нашр этилди. Китобда “Оқдарё овози” газетасининг шонли ва шарафли тарихи, бу даргоҳда меҳнат қилган устозлар, мақолалар, фелъетонлар, хотиралар, ҳамкасблар эътирофи ўрин олган. 
  Бугун туман Ахборот-кутубхона марказида “Оқдарёнинг ҳақ овози” китобининг тақдимоти ўтказилди. Тадбирда иштирок этган туман Маънавият ва Маърифат бўлимининг раҳбари Диёра Юсупова, шоиралар Эркиной Қаршиева, Назира Абиева, ижодкор педагог Донохол Асророва, меҳнат фахрийлари Абдуназар Холмуродов, Собир Амиров, Абдуманнон Отақулов ва бошқалар сўзга чиқишиб, китобнинг аҳамияти ва бугунги ёш журналистлар учун муҳим қўлланма эканлигини алоҳида таъкидладилар. Тадбир сўнггида муаллиф кутубхона марказига ўзи ёзган ва мумтоз адабиётимиз вакилларининг китобларидан совға қилди.  
  Тадбир давомида туман маданият бўлимининг 43-сон маданият маркази бадиий раҳбари Толиб Пирматов бошчилигидаги санъаткорлар томонидан янграган куй ва қўшиқлар даврага файз киритди.
  Ўтказилган китоб тақдимоти барча қатнашчиларда бир олам таассурот қолдирди.