"ДОИМО ЁДИМДАСИЗ, УСТОЗИМ!"

Зирафо Aбдираҳмонова 1917 йил Самарқанд шаҳар Чорраҳа маҳалласида туғилган. 1946 йил туманимиздаги Жар қишлоғига келин бўлиб тушган. Зирафо Aбдураҳмонова Самарқанд педагогика билим юртини муваффақиятли тугатиб, 34-мактабда узоқ йиллар педагоглик иш фаолиятини олиб борган. Шунингдек,  7 нафар фарзандини тарбиялаб, уларнинг барчасини ўқитиб, жамиятимиз ривожланишига ўз ҳиссасини қўшадиган фарзандлар қилиб тарбиялаган. Фар-зандлари Амриддин Негматов Тошкент Давлат халқ хўжалиги  университетини битириб, Самарқанд вилоят  назорат тафтиш бўлимида ишлаб, айни пайтда нафақага чиққан. Актамжон Негматов ИИБ ходими бўлиб нафақага чиққан. Шоҳида Негматова қатор йиллар туман халқ таълими бўлими мудири вазифасида ишлаб, нафақага чиққан. Шуҳрат Негматов Самарқанд Давлат университетининг математика факультетини битирган. Айни пайтда Иштихон тумани ҳокими вазифасида ишлаётир. Қаҳрамон Негматов Тошкент Давлат Ирригация университетида ўқиган. Ҳозирда қурувчи бўлиб ишлаб келмоқда.
Дарҳақиқат, ҳаётда яхши инсонларнинг номи ҳамиша эъзозда бўлса, унинг хотираси доимо дилларда сақланади. Шу боисдан ҳам миллий анъаналаримизга кўра уларни доимо ёдга оламиз, яхши амалларини давом эттирамиз, ибратли умр йўли, халқимиз, она Ватанимиз равнақи йўлидаги фидойиликларини ёш авлодга ибрат қилиб кўрсатамиз. 
Зирафо она Абдураҳмонованинг хотирасига бағишлаб 34-умумий ўрта таълим мактабида ўтказилган тадбир ҳам ана шундай  муҳим тадбирларимиздан бири бўлди. Ушбу тадбирда онахоннинг ибратли умр йўли, ёрқин хотираси фарзандлари, яқин қариндошлари, ҳамқишлоқлари, ҳамкасблари,  қарийб юз ёшни қарши олаётган шогирдлари Раҳима она, Бодом она ҳамда Н.Дўстбековалар томонидан яна бир бор ёдга олинди.
Зирафо  онага бағишлаб ўтказилган "Доимо ёдимдасиз, устозим!", деб номланган ушбу тадбирга қишлоқ аҳли, фахрий ўқитувчилар таклиф қилиниб, уларга турли хил      совғалар берилди. Тадбирда катта қозонларда ош дамланиб бетобларга, тадбирга келолмаган қарияларга йўқловлар қилинди. Тадбирда  энг фаол  ўқитувчи ва ўқувчилар фахрий ёрлиқ ва ташаккурномалар билан тақдирланди.