ЯРМИ АСФАЛЬТ, ЯРМИ ТОШ КЎЧАЛАР

Халқимизда "Йўлинг соз бўлса, машаққатинг оз бўлади", деган нақл бежизга айтилмаган. Дарҳақиқат, йўлларнинг ҳар томонлама созлиги, замонавий талабларга жавоб бериши халқимизнинг фаровон турмуш тарзини белгилашда муҳим аҳамият касб этади. Бугунги кунда туманимизнинг кўпгина маҳаллаларидаги кўчалар замонавий касб этиб, кундан кунга чирой очмоқдаки, бу халқимизнинг турмуш фаровонлигини таъминлашда муҳим омил бўлмоқда. Бу яхши албатта. Лекин, минг афсуски, айрим йўлларимиздаги аҳвол ва носозликлар аҳолининг ҳақли эътирозига сабаб бўлаётганлиги, бунга эса тегишли мутасадди раҳбарлар эътиборсизлик қилаётганлигини қандай изоҳлаш мумкин?
Янгиқўрғон МФЙга қарашли Янгиобод маҳалласининг марказий кўча яқинидаги ички йўллари асфальт қилинаётганлиги шу ерда истиқомат қилувчи аҳолини беҳад қувонтирди. Негаки, кўп йиллардан бери асфальт кўрмаган ушбу кўчалар замонавий йўлларга айланса, айни муддао бўлар эди. Лекин, аҳолининг қувончи узоққа чўзилмади, кўчанинг ярмидан кўпроқ қисми асфальт қилинди-ю, қолган қисми чала қолиб кетганлиги кишиларни қаттиқ ранжитди. Улар кимга мурожаат қилишмасин, ҳеч қандай натижаси бўлмаяпти.
Таҳририятдан: Янгиқўрғон МФЙга қарашли Янгиобод маҳалласида яшовчи аҳолининг қатъий норозилигига сабаб бўлаётган ушбу муаммони ҳал этишда тегишли ташкилот мутасаддиларининг жавобини кутиб қоламиз.