"ЎРГАНГАН КЎНГИЛ ЎРТАНСА ҚЎЙМАС"

Халқимизда "Ўрганган кўнгил ўртанса қўймас", деган нақл бор. Судланувчи Рашида Абдиева (исми-шарифи ўзгартирилган) муқаддам қайта-қайта судланган бўлсада, яна қайтадан жиноят кўчасига кириб, жиноий ишга қўл урди. У суд жараёнларида қилган ишидан минг пушаймон бўлган бўлсада, такроран жиноят содир этди. 
Судланувчи Рашида Абдиева хавфли рецидивист бўла туриб, 2022 йил 15 март кунидан 2022 йил 12 апрель кунига қадар бўлган вақт мобайнида Самарқанд шаҳар, "Обод маскан" маҳалла фуқаролар йиғинига қарашли бўлган хонадонларнинг бирида яшовчи фуқаро Зуҳра Раҳимова билан "Telegram" ижтимоий тармоғи орқали танишиб, унинг ишончига киради. Шундан сўнг у Зуҳрага тегишли бўлган, Россия Федерациясида ишлаб чиқарилган "Faberlic" фирмасининг атторлик (косметика) маҳсулотларини олиб қолиб, бир ҳафталик муддатда пулларини қайтариб беришга ваъда қилади, "Лойиш" шаҳарчасида ўзига тегишли бўлган "Аёллар гўзаллик салони" борлиги тўғрисида ёлғон маълумотларни айтиб уни ишонтиради. Шунингдек, у атторлик буюмларини мазкур салонда ишлатишлигини билдириб, фирибгарлик йўли билан Зуҳрани алдаб, унинг жами 12.784.000 сўмлик мулкларини қўлга киритиб, мазкур атторлик маҳсулотларини сотиб юбориб, пулларини ўзининг эҳтиёжлари учун ишлатиб юборган.
Суд мажлисида судланувчи тариқасида сўроқ қилинган Рашида Абдиева ўзининг кўрсатувида, айбига тўлиқ иқрорлик билдирди. У 2022 йил март ойида "Telegram" интернет ижтимоий тармоғининг "Оқдарёликлар" канали орқали Самарқанд шаҳрида яшовчи Зуҳра исмли аёл билан танишиб қолади. Зуҳранинг ўзи унга "Telegram" мессенжиридан ёзиб, ўзи "Faberlic" косметик нарсалар савдоси билан шуғулланиб келишини, ушбу компанияга аъзо эканлигини, ушбу компанияда савдо ишлари билан шуғулланиб келишини, агар у ҳам аъзо бўлса, унга ёрдам беришини таклиф қилади. Рашида ҳам косметик нарсаларни сотишга қизиқишини ҳамда бирор бир жойда ишламаганлиги сабабли Зуҳ- радан "Faberlic" компаниясига ишга кириш тартибини ва қанча миқдорда пул олишини сўрайди. Зуҳра унга аъзо бўлиб, мижозлар йиғса, ойлиги ҳар ойига 3.000.000 сўм бўлишини, агар косметик нарсаларини сотиш билан шуғулланса, ойига 5-6 миллион сўм пул топиши мумкинлигини айтиб ўтади. У "Faberlic" компаниясида ишлашга қизиқиб қолади.  2022 йил 15 март куни Зуҳрани бир ўзи уни яшаш уйига кириб келади. Яшаш уйига келгандан сўнг, у унга фуқаролик паспортини нусхасини беришини, паспорт нусхасини серияси асосида "Faberlic" компаниясига аъзо қилишини айтиб ўтгандан сўнг, у унга паспортини беради ва уни яшаш уйининг ўзида "Faberlic" компаниясига аъзо қилади. Зуҳра уни яшаш уйига келган вақтида ўзи билан бирга "Faberlic" компаниясини косметик нарсаларини ҳам олиб келган эди. У унга олиб келган косметик нарсаларини сотишини ва пулларини йиғиб беришини айтиб ташлаб кетади. Агар яна нарсалар керак бўлса етказиб туришлигини айтиб ўтади. Зуҳра унга косметик нарсаларни ташлаб кетаётган вақтида, уни яшаш уйида қўшниси Санам ҳам бўлганлигини, у Зуҳрадан нарсаларни олганидан сўнг шу вақтнинг ўзида Санамга жами 223.000 сўмлик косметик нарсаларни қарзга беради. У Зуҳрадан косметик нарсаларни олиб қолганидан сўнг, орадан 10 кунлар вақт ўтгандан сўнг, Зуҳра унга яна қўнғироқ қилиб, опасидан янги товарлар бериб юбораётганлигини, ушбу нарсаларни ҳам танишларга сотишини айтади. У Зуҳ- ра иккинчи маротаба бериб юборган нарсаларини Оқдарё тумани, Лойиш шаҳарчасида қабул қилиб олади ва олган косметик нарсаларни танишларига қарзга тарқатиб юборади. Орадан кўп ўтмасдан Зуҳра уни яшаш уйига ўзи билан қўшни бўлиб яшовчи таниши билан бирга келиб, ундан сотилмасдан қолган косметик нарсаларини қайтариб олиб, унга яна ўзи билан олиб келган косметик нарсаларни ташлаб кетади. У эса олган косметик нарсаларни танишларига ва ўзига таниш бўлган савдо дўконларига бориб тарқатиб қарзга бериб келади. Охир-оқибатда Рашида қўлма-қўл бўлиб ўтаётган косметик нарсаларни баҳоси қанча эканлигини билмай ҳам қолган эди. 
Судланувчи Рашида Абдиева, Ўзбекистон Республикаси ЖК 168-моддаси 3-қисмининг "б" бандида назарда тутилган жиноятни содир этганликда айбли деб топилди.
Ўзбекистон Республикаси ЖК 60,61-моддаларига асосан жиноят ишлари бўйича Оқдарё туман судининг 2021 йил 23 апрелдаги ҳукмининг шартлилиги бекор қилиниб ва тайинланган жазонинг ўталмаган қисмини қисман қўшиш йўли билан ҳукмлар мажмуи бўйича узил-кесил ўташлик учун 5 йил 1ой муддатга озодликдан маҳрум қилиш жазоси тайинланди.