ТАЪЛИМ- ТАРБИЯ БЕРИШ ЖАРАЁНИДАГИ ЭНГ МУҲИМ ЁНДАШУВ

«Ёшлар келажаги билан боғлиқ ҳар қандай
 вазифа бирламчи аҳамиятга эга»
                                Ш. Мирзиёев.     
Муҳтарам Президентимиз таъкидлаганларидек, ёшларимиз ҳаётидаги ҳар бир жараён биз учун жуда муҳимдир. Инсон туғилган вақтидан бошлаб қандайдир фаолиятнинг иштирокчиси бўлади ва  нимагадир ўзининг қизиқишини намоён эта бошлайди. Бу қизиқишлар уларнинг ўйинларида   ўз аксини топади, Бу эса айнан мактабгача бўлган ёш даврга  тўғри келади. 
Мактабгача таълим, таълим соҳасининг бошланғич бўғини бўлиб, бугунги кун ёшларимиз илк таълимни айнан шу масканда олмоқдалар. Айни ўйинқароқ тиниб-тинчимайдиган болажонларимизнинг асосий вақти ўйин билан ўтса улар қандай таълим олишмоқда? 
Ўйин: мазмунга бой тушунча, болалар ҳаётининг асосий қисми бўлган ўйин аслида бизга нима беради? Мактабгача ёш давридаги болажонларимиз ҳозирги кунга келиб айнан биз таъкидлаган ўйинлар орқали таълим олмоқда. Мактабгача ёшдаги болаларга таълим беришнинг асосий шакли ҳам ўйин тарзида олиб борилади. Мактабгача таълим ташкилотида биз айтмоқчи бўлган «ЎЙИН» таълим-тарбия бериш жараёнидаги энг муҳим ёндашувдир. Ўйин қувонч келтиради ва болаларни рағбатлантиради, уларга янги кўникма ва билимларни ўрганишга ёрдам беради.
Бола турли ўйинларда иштирок этар экан, бевосита атроф оламдаги ўзгаришларнинг иштирокчиси бўлиб қатнашади ва янги билимларни ўзлаштириши учун имкон туғилади. Мактабгача таълим тизимида ҳам ўйин боланинг ҳаётида етакчи ўринни эгаллайди ва таълим-тарбия бериш жараёнлари асосан таълимий, ижодий, ихтиёрий ва ҳаракатли ўйинларга таянган ҳолда олиб борилади. 
Хулоса қилиб айтганда, барчамиз фарзандларимизга таълим ва тарбия бериш жараёнларида масъулмиз. Шундай экан, турли хилдаги ўйинлар орқали уларни ўзимизга эргаштира олсак ва билим бера олсак, ўйлайманки, фарзандларимиз албатта биздан-да буюк ва биздан-да қудратлироқ бўлишади. Биз педагоглар эса жажжи ўғил-қизларимизнинг келажагига ишончли пойдевор қуйган ҳамда ўз олдимиздаги вазифамизни адо этган бўламиз.