Фахрийлар – фахримиз АРПААРИҚЛИК ФИДОЙИ ИНСОН

Тўйчи Эсанов 1950 йил 15 февралда Оқдарё туманидаги Арпаариқ қишлоғида таваллуд топган. 1967 йилда Самарқанд давлат педагогика институтининг математика факультетига ўқишга кириб, 1972 йилда олийгоҳни аъло баҳолар билан тугатган. Меҳнат фаолиятини шу йилнинг ўзидаёқ 1-ўрта мактабидан бошлаган. 1975 йилдан ўзи туғилиб вояга етган Арпаариқ қишлоғидаги 4-ўрта мактабида директорлик вазифасидан давом эттиради. Беш йил мобайнида мазкур мактабга раҳбарлик қилган. 1980-1990 йилларда Янгиқўрғон қишлоқ Кенгаши котиблигидан раис лавозимигача бўлган йўлни босиб ўтган. 1990 йилда Оқдарё туман ҳокимлигида ташкилий назорат гуруҳи раҳбари, 1993-2000 йилларда яна ўз мактабида директорлик ва оддий ўқитувчилик орқали касбий фаолиятини тугатган. 

- Ҳам устоз, ҳам қадрдон акамиз Тўйчи Эсановни қишлоқдошларимиз жуда ҳурмат билан эъзозлашади, - дейди Арпаариқ қишлоғида вояга етган  касбдош акам Oдил Қувондиқов. - Чунки Тўйчи акамизни раҳматли отам ҳам фақат яхши сўзлар билан тилга оларди. Боиси, бу инсон ўқитувчилик касбида ҳам,  ҳокимият тизимидаги раҳбарлик вазифаларида ҳам тўғри ва ҳалоллик билан ишлаганликлари ҳақида қишлоғимизнинг бошқа мўйсафидларидан ҳам кўп бора эшитганмиз. 

Камина ҳам бу фахрий педагог қаламига мансуб мақолаларини "Оқдарё овози" газетасида  кўп бора ўқиганман. Очиғи, мен устозни филолог ўқитувчи деб тасаввур этган эканман. Аслида эса мутахассислиги математик ўқитувчи эканлигини яқинда устоз   билан бўлиб ўтган суҳбатда маълум бўлди. Менинг ҳайрон бўлганимнинг сабаби математика ўқитувчиси қандай қилиб сўзлар ва жумлаларни бунчалик даражада тўғри ёзган экан-а? Бу саволимга жавоб ҳам Одил акам айтганидек, у кишининг ёшлигидан жуда кўп китоб ўқиганликлари сабаб бўлган экан. 

Келинг, бу фахрий устознинг яқиндагина амалга оширган яна бир эзгу иши ҳақида сўзлаб берайин.  Туманимиздаги Арпаариқ маҳалласи "Турон" маҳалласи номи билан юритилар эди. Табиийки, бу ном Арпаариқ қишлоқ аҳолисига манзур бўлмади. Негаки, азал-азалдан Арпа қишлоқ ҳамда шу ном асосида маҳаллага ном берилган эди. Кейинчалик   эса маҳалла "Турон" номига ўзгартирилган. Бундай тушунмовчиликларга барҳам бериш учун Тўйчи Эсанов ўз зиммасига оғир масъулиятни олади ҳамда қишлоқ номини Арпаариққа яна ўзгартириш учун қаттиқ киришади. Бунинг учун қишлоқ тарихи бўйича тўплаган материалларини қоғозга тушириб, "Оқдарё овози" газетасининг 2024 йил 28 декабрь №36-сонидаги "Шахсий фикр" рукни остида "Қишлоқларимиз номини ўзгартирса бўладими?" сарлавҳали мақоласи чоп этилади. Шундан сўнг, бу мақолани янада қўшимча маълумотлар билан кенгайтирилиб, Самарқанд вилоят ҳокимлиги ва вилоят халқ  депутатлари нашри саналган "Зарафшон" газетасида ҳам ёритилади. 

Ташаббускор ва фидойи отахоннинг тинимсиз уринишлари бесамар кетмади. Хайрли ва эзгу ҳаракати  амалга ошадиган бўлди. Шу йилнинг январь ойида бўлиб ўтган Халқ депутатлари вилоят кенгашининг сессиясида Оқдарё туманидаги "Турон" маҳалла фуқаролар йиғинининг номини қайта номлаш бўйича кун тартибида кўриб чиқилиб, депутатлар томонидан бир овоздан маъқулланди. 

Бир сўз билан айтганда, оқил раҳбар, фахрий педагог Тўйчи Эсановнинг бундай хайрли ишлари ҳақида яна кўплаб мисоллар келтириш мумкин. Обод маҳалла йўлида Тўйчи Эсановга ўхшаган эзгу ишларни бошини тутганларга яқиндан кўмаклашиш, ёрдамлашиш барчамизнинг муқаддас бурчимиздир! Зеро, Тўйчи Эсановга ўхшаган фидойи инсонларгина ўз ҳаловатларидан воз кечиб, маҳалла равнақи учун астойдил ташаббус билан ҳаракат қилишади. Бундай инсонлардан ибрат олайлик ҳамда уларга муносиб авлод бўлайлик, азиз  юртдошлар!